டங்ஸ்டன் சுரங்கம் விவகாரம்: என்ன நடந்தது ? என்பது குறித்து விரிவான அறிக்கை...டி.டி.வி. தினகரன் வலியுறுத்தல்

சென்னை ,

அ.ம.மு.க. பொதுச்செயலாளர் டி.டி.வி. தினகரன் வெளியிட்டுள்ள எக்ஸ் தள பதிவில்,

மதுரை மாவட்டம் அரிட்டாபட்டியை உள்ளடக்கிய 2015 ஹெக்டர் பரப்பளவில் டங்ஸ்டன் கனிமம் எடுப்பதற்கு ஆய்வுடன் கூடிய சுரங்க குத்தகை உரிமம் மத்திய அரசின் மூலம் வழங்கப்பட்டிருப்பதற்கு எதிர்ப்பு தெரிவித்து அப்பகுதி விவசாயிகளும், பொதுமக்களும் கடும் எதிர்ப்பை தெரிவித்து வருகின்றனர்.

மதுரை அரிட்டாபட்டியில் டங்க்ஸ்டன் சுரங்க ஏலம் விடுவதற்கு முன்பாக மாநில அரசிடம் கேட்கப்பட்ட கருத்தின் போது எந்தவித எதிர்ப்பையும் பதிவு செய்யவில்லை என மத்திய அரசு கூறியிருப்பதாக வெளியாகியிருக்கும் செய்திகள் திமுக அரசின் இரட்டை வேடத்தை வெளிச்சம் போட்டுக் காட்டுகின்றன.

மக்கள் தொகை அதிகமுள்ள கிராமங்களையும், பறவையினங்கள், அரியவகை வனவிலங்குகள், இயற்கை நீருற்று குளங்கள், சமண சிற்பங்கள், சமணப் படுகைகள் என தமிழர்களின் பண்டையகால வரலாற்றை பறைசாற்றும் வகையில் அமைந்திருக்கும் அரிட்டாபட்டி பகுதியில் டங்ஸ்டன் சுரங்கம் அமைக்க அனுமதி வழங்கிய போது எதிர்ப்பு தெரிவிக்காத முதல்-அமைச்சர், பொதுமக்கள் போராட்டத்திற்கு பின் பிரதமருக்கு கடிதம் எழுதுவது போல நாடகமாடுவது கடும் கண்டனத்திற்குரியது.

ஏற்கனவே காங்கிரஸ் - திமுக கூட்டணி ஆட்சிக்காலத்தின் போது கொண்டுவரப்பட்ட ஹைட்ரோகார்பன் மற்றும் மீத்தேன் திட்டத்தின் தாக்கம் காவிரி டெல்டா மாவட்டங்களில் இன்று வரை எதிரொலித்துக் கொண்டிருக்கும் நிலையில், தற்போது மதுரை அரிட்டாபட்டி பல்லுயிர் தளத்தையும் அடியோடு அழிக்கும் முயற்சியை ஒருபோதும் அனுமதிக்க முடியாது.

எனவே, மதுரை அரிட்டாபட்டியில் டங்ஸ்டன் சுரங்கம் தொடர்பாக பல்வேறு விதமான வாதங்கள் நடைபெற்று வரும் நிலையில், என்ன நடந்தது ? என்பது குறித்து விரிவான அறிக்கை வெளியிடுவதோடு, மக்கள் எதிர்ப்பை சுட்டிக்காட்டி டங்ஸ்டன் சுரங்கம் அமைப்பதற்கு வழங்கப்பட்ட அனுமதியை திரும்பப் பெறும் வகையில், நடைபெற உள்ள சட்டமன்ற கூட்டத்தொடரில் தீர்மானம் நிறைவேற்றிடவும் தமிழக முதல்-அமைச்சர் மு.க.ஸ்டாலின் அவர்களை வலியுறுத்துகிறேன். என தெரிவித்துள்ளார்.