அஜித்தின் 64-வது படத்தை இயக்கும் பிரபல இயக்குனர்
|ஆதிக் ரவிச்சந்திரன் இயக்கிய அஜித்தின் 63-வது படமான 'குட் பேட் அக்லி' ஏப்ரல் மாதம் வெளியாக உள்ளது.
சென்னை,
தென்னிந்திய திரையுலகின் முன்னணி நடிகரான அஜித், துணிவு படத்தை தொடர்ந்து 'விடாமுயற்சி' படத்தில் நடித்துள்ளார். மகிழ் திருமேனி இயக்கிய இப்படம் கடந்த 6-ந் தேதி வெளியானது. இந்த படத்தில் அர்ஜுன், திரிஷா, ரெஜினா, சந்தீப் கிஷன், ஆரவ் உள்ளிட்டோர் நடித்துள்ளனர். இப்படத்தை லைகா நிறுவனம் தயாரித்துள்ள இப்படத்திற்கு அனிருத் இசையமைத்துள்ளார். இப்படம் மக்கள் மத்தியில் நல்ல வரவேற்பை பெற்று வருகிறது.
அதனை தொடர்ந்து ஆதிக் ரவிச்சந்திரன் இயக்கத்தில் தனது 63-வது படமான 'குட் பேட் அக்லி' படத்தில் நடித்து முடித்துள்ளார். இந்த படத்தில் அஜித்துடன் இணைந்து திரிஷா, பிரசன்னா, சுனில், அர்ஜுன் தாஸ், பிரபு உள்ளிட்டோர் நடித்துள்ளர். மைத்ரி மூவி மேக்கர்ஸ் நிறுவனம் தயாரித்துள்ள இந்த படத்திற்கு இசையமைப்பாளர் ஜி.வி பிரகாஷ் இசையமைத்துள்ளார். இப்படம் வருகிற ஏப்ரல் 10-ம் தேதி வெளியாக உள்ளது.
இந்த நிலையில் அஜித்தின் அடுத்த படமான 64-வது படத்தை இயக்கப்போவது யார் என்ற கேள்வி கடந்த பல மாதங்களாக இருந்து வருகின்றது. இந்த படத்தினை சிவா அல்லது விஷ்ணு வர்தன் இவர்கள் இருவரில் யாராவது இயக்குவார்கள் என கூறப்பட்டு வந்தது. ஆனால் இவர்கள் இருவரும் இல்லை என்றும் கார்த்திக் சுப்பராஜ் தான் அஜித்தின் 64-வது படத்தை இயக்கவுள்ளார் என்று புதிய தகவல்கள் வெளியாகி உள்ளன. விரைவில் இது தொடர்பான அதிகாரபூர்வ தகவல்கள் வெளியாகும் என்று எதிர்பார்க்கப்படுகிறது.
