உலக கோப்பை கால்பந்து: அர்ஜென்டினா, ஜெர்மனி அணியினர் வருகை

தோகா,

உலக கோப்பை கால்பந்து போட்டியில் பங்கேற்பதற்காக லயோனல் மெஸ்சி தலைமையிலான அர்ஜென்டினா அணி வீரர்கள் நேற்று காலை கத்தார் தலைநகர் தோகா வந்தடைந்தனர்.

ஏற்கனவே அபுதாபி வந்து ஐக்கிய அரபு அமீரகத்துக்கு எதிரான போட்டியில் 5-0 என்ற கோல் கணக்கில் வெற்றி பெற்ற அர்ஜென்டினா அணியினர் அங்கிருந்து விமானத்தில் தோகா சென்றுள்ளனர். 'சி' பிரிவில் இடம் பெற்றுள்ள அர்ஜென்டினா தனது தொடக்க ஆட்டத்தில் சவுதிஅரேபியாவுடன் வருகிற 22-ந்தேதி மோதுகிறது.

இதே போல் முந்தைய நாள் இரவில் மஸ்கட்டில் நடந்த ஓமனுக்கு எதிரான ஆட்டத்தில் 1-0 என்ற கோல் கணக்கில் வெற்றி பெற்ற மானுவல் நீயர் தலைமையிலான ஜெர்மனி வீரர்களும் நேற்று கத்தார் சென்றனர். 4 முறை சாம்பியனான ஜெர்மனி அணி தனது முதல் ஆட்டத்தில் 23-ந்தேதி ஜப்பானை (இ பிரிவு) எதிர்கொள்கிறது.