ஐரோப்பிய கால்பந்து சாம்பியன்ஷிப்: ஜார்ஜியா - செக் குடியரசு ஆட்டம் டிரா

ஹாம்பர்க்,

17-வது ஐரோப்பிய கால்பந்து சாம்பியன்ஷிப் (யூரோ) போட்டி ஜெர்மனியில் நடந்து வருகிறது. இதில் பங்கேற்றுள்ள 24 அணிகள் 6 பிரிவாக பிரிக்கப்பட்டுள்ளன. ஒவ்வொரு அணியும், தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும்.லீக் சுற்று முடிவில் ஒவ்வொரு பிரிவிலும் முதல் இரு இடங்களை பிடிக்கும் அணிகள், 3-வது இடத்தை பெறும் சிறந்த 4 அணிகள் என்று மொத்தம் 16 அணிகள் 'நாக்-அவுட்' சுற்றுக்கு தகுதி பெறும்.

இந்நிலையில் இந்த தொடரில் இன்று மாலை 6.30 மணிக்கு நடைபெற்ற ஒரு ஆட்டத்தில் ஜார்ஜியா - செக் குடியரசு அணிகள் மோதின. ஆரம்பம் முதலே விறுவிறுப்பாக நடைபெற்ற இந்த ஆட்டத்தின் முதல் பாதியில் ஜார்ஜியா அணி ஒரு கோல் அடித்து 1-0 என முன்னிலை பெற்றது.

தொடர்ந்து நடைபெற்ற 2வது பாதி ஆட்டத்தில் செக் குடியரசு அணி ஒரு கோல் அடித்து ஆட்டத்தை சமன் செய்தது. இறுதியில் ஆட்ட நேர முடிவில் இரு அணிகளும் தலா ஒரு கோல் அடித்த நிலையில் ஆட்டம் சமனில் முடிந்தது.