உள்ளூரில் ஆதிக்கம் செலுத்தும் வேட்கையில் பஞ்சாப் - பெங்களூரு அணியுடன் இன்று மோதல்

மொகாலி,

10 அணிகள் பங்கேற்றுள்ள 16-வது ஐ.பி.எல். கிரிக்கெட் போட்டி இந்தியாவின் பல்வேறு நகரங்களில் நடந்து வருகிறது. இந்த கிரிக்கெட் திருவிழாவில் மொகாலியில் இன்று மாலை 3.30 மணிக்கு நடைபெறும் 27-வது லீக் ஆட்டத்தில் பஞ்சாப் கிங்ஸ்அணி, பெங்களூரு ராயல் சேலஞ்சர்ஸ் அணியுடன் மோதுகிறது.

இந்த சீசனில் இதுவரை 5 ஆட்டங்களில் விளையாடியுள்ள பஞ்சாப் அணி அதில் 3-ல் வெற்றியும் (கொல்கத்தா, ராஜஸ்தான், லக்னோவுக்கு எதிராக), 2-ல் தோல்வியும் (ஐதராபாத், குஜராத்துக்கு எதிராக) கண்டுள்ளது. முந்தைய ஆட்டத்தில் தோள்பட்டை காயத்தால் ஓய்வு அளிக்கப்பட்டிருந்த கேப்டன் ஷிகர் தவான் அணிக்கு திரும்புவார் என்று தெரிகிறது. இதே போல காயத்தில் இருந்து குணமடைந்து தீவிர பயிற்சியில் ஈடுபட்டுள்ள அதிரடி ஆல்-ரவுண்டர் லியாம் லிவிங்ஸ்டனின் பெயர் அணித் தேர்வுக்கு பரிசீலிக்கப்படலாம். பெங்களூருவுக்கு எதிராக மோதிய கடைசி 6 ஆட்டங்களில் 5-ல் வெற்றி பெற்றுள்ள பஞ்சாப் அணி உள்ளூரில் ஆதிக்கம் செலுத்தும் முனைப்புடன் தயாராகி வருகிறது.

பெங்களூரு அணியை எடுத்துக் கொண்டால், 5 ஆட்டங்களில் ஆடி 2-ல் வெற்றி (மும்பை, டெல்லிக்கு எதிராக), 3-ல் தோல்வி (கொல்கத்தா, லக்னோ, சென்னைக்கு எதிராக) என்று 4 புள்ளியுடன் 8-வது இடத்தில் இருக்கிறது. சென்னைக்கு எதிரான ஆட்டத்தில் 227 ரன்கள் இலக்கை நோக்கி ஆடிய பெங்களூரு அணி நெருங்கி வந்து 8 ரன் வித்தியாசத்தில் தோற்றது.

விராட் கோலி, பிளிஸ்சிஸ், மேக்ஸ்வெல் ஆகியோரைத் தான் பெங்களூரு மலைபோல் நம்பி இருக்கிறது. இவர்கள் ஜொலித்தால் மட்டுமே வெற்றிப்பாதைக்கு திரும்ப முடியும். இன்னும் முழு உடல்தகுதியை எட்டாத வேகப்பந்து வீச்சாளர் ஹேசில்வுட் இன்றைய ஆட்டத்திலும் விளையாட வாய்ப்பில்லை.