உலகக் கோப்பை கிரிக்கெட்; அதிக விக்கெட் வீழ்த்தியோர் பட்டியலில் ஆடம் ஜம்பா முதலிடம்

புதுடெல்லி,

உலகக் கோப்பை கிரிக்கெட்டில் மேக்ஸ்வெல், வார்னர் ஆகியோரது அபார சதத்தோடு ஆஸ்திரேலிய அணி 309 ரன் வித்தியாசத்தில் நெதர்லாந்தை ஊதித்தள்ளியது. ஆஸ்திரேலிய சுழற்பந்து வீச்சாளர் ஆடம் ஜம்பா இந்த ஆட்டத்தில் 3 ஓவரில் 8 ரன் மட்டுமே வழங்கி 4 விக்கெட்டுகளை அள்ளினார்.

ஆடம் ஜம்பா தொடர்ந்து 3 ஆட்டங்களில் 4 விக்கெட் வீதம் அறுவடை செய்திருக்கிறார். இதன் மூலம் உலகக் கோப்பையில் 4 அல்லது அதற்கு மேல் விக்கெட்டுகளை தொடர்ந்து 3 ஆட்டங்களில் கைப்பற்றிய 3-வது வீரர் என்ற சிறப்பை ஜம்பா பெற்றார். ஏற்கனவே பாகிஸ்தானின் சாகித் அப்ரிடி 2011-ம் ஆண்டிலும், இந்தியாவின் முகமது ஷமி 2019-ம் ஆண்டு உலகக் கோப்பையிலும் இச்சாதனையை செய்துள்ளனர்.

அத்துடன் நடப்பு உலகக் கோப்பையில் அதிக விக்கெட் வீழ்த்தியோர் பட்டியலில் ஆடம் ஜம்பா 13 விக்கெட்டுகளுடன் முதலிடத்துக்கு முன்னேறியுள்ளார். நியூசிலாந்தின் மிட்செல் சான்ட்னெர் (12 விக்கெட்) 2-வது இடத்தில் இருக்கிறார்.