டெஸ்ட் கிரிக்கெட் பேட்ஸ்மேன் தரவரிசையில் பாபர் அசாம் 2-வது இடத்துக்கு முன்னேற்றம்
|தரவரிசையில் 2-வது இடத்தில் இருந்த ஆஸ்திரேலியாவின் ஸ்டீவன் சுமித் 3-வது இடத்துக்கு தள்ளப்பட்டார்.
துபாய்,
டெஸ்ட் கிரிக்கெட் வீரர்களின் புதிய தரவரிசை பட்டியலை சர்வதேச கிரிக்கெட் கவுன்சில் (ஐ.சி.சி.) நேற்று வெளியிட்டது. இதன்படி பேட்ஸ்மேன் தரவரிசையில் ஆஸ்திரேலிய வீரர் மார்னஸ் லபுஸ்சேன் (936 புள்ளி) முதலிடத்தில் நீடிக்கிறார்.
பாகிஸ்தான் கேப்டன் பாபர் அசாம் இங்கிலாந்துக்கு எதிரான 3-வது டெஸ்டில் இரண்டு அரைசதம் விளாசியதன் மூலம் (875 புள்ளி) ஒரு இடம் முன்னேறி 2-வது இடத்தை பிடித்துள்ளார். இது அவரது சிறந்த தரநிலையாகும். இதனால் 2-வது இடத்தில் இருந்த ஆஸ்திரேலியாவின் ஸ்டீவன் சுமித் 3-வது இடத்துக்கு தள்ளப்பட்டார்.
ஆஸ்திரேலிய வீரர் டிராவிஸ் ஹெட் (826 புள்ளி) 3 இடம் அதிகரித்து முதல்முறையாக டாப்-5 இடங்களுக்குள் நுழைந்து 4-வது இடத்தை பிடித்துள்ளார். இந்தியாவின் ரிஷப் பண்ட் 6-வது இடத்திலும், ரோகித் சர்மா 9-வது இடத்திலும், விராட் கோலி 12-வது இடத்திலும் உள்ளனர்.
வங்காளதேசத்துக்கு எதிரான முதலாவது டெஸ்டில் சிறப்பாக ஆடிய இந்திய வீரர்கள் புஜாரா 19 இடங்கள் எகிறி 19-வது இடத்தையும், ஸ்ரேயாஸ் அய்யர் 11 இடங்கள் உயர்ந்து 26-வது இடத்தையும், சுப்மான் கில் 10 இடம் ஏற்றம் கண்டு 54-வது இடத்தையும் பெற்றுள்ளனர்.