இன்னல்களைப் போக்கும் இருக்கன்குடி மாரியம்மன்

ஆடி மாதம் என்றாலே அம்மனுக்கு உகந்த மாதம் என்பர். ஆடி மாதம் முழுவதும் அம்மன் கோவில்கள் விழாக்கோலம் பூண்டு காணப்படும். அந்த வகையில் இருக்கன்குடி மாரியம்மன் கோவிலில் நடைபெறும் ஆடி கடைசி வெள்ளி திருவிழா மிகவும் பிரசித்தி பெற்றது. விருதுநகர் மாவட்டம் சாத்தூர் அருகே உள்ளது, இருக்கன்குடி மாரியம்மன் கோவில். இந்தக் கோவிலுக்கு தினமும் பல்வேறு மாவட்டங்களிலும் இருந்தும், மாநிலங்களிலும் இருந்தும் ஆயிரக்கணக்கான பக்தர்கள் வருகின்றனர்.

பழமை வாய்ந்த இந்தக் கோவிலில் ஆண்டுதோறும் ஆடி மாதம் கடைசி வெள்ளிக்கிழமையில் திருவிழா நடைபெறும். அதேபோல இந்த ஆண்டு திருவிழா கடந்த 4-ந் தேதி கொடியேற்றத்துடன் தொடங்கியது. விழாவினை முன்னிட்டு தினமும் அம்மனுக்கு சிறப்பு பூஜைகள் நடைபெற்று வருகிறது. விழாவின் முக்கிய நிகழ்ச்சியான ரிஷப வாகனத்தில் அம்மன் வீதி உலா வரும் நிகழ்ச்சி கடைசி வெள்ளிக்கிழமையான 11-ந் தேதி (இன்று) நடைபெறுகிறது. இதில் தமிழ்நாடு மட்டுமின்றி பல்வேறு பகுதிகளில் இருந்தும் எண்ணற்ற பக்தர்கள் கலந்துகொள்வர்.

பொதுவாக அனைத்து கோவில்களிலும் உற்சவரும், மூலவரும் ஒரே இடத்தில் இருப்பது வழக்கம். ஆனால் இந்தக் கோவிலில் உற்சவரும், மூலவரும் தனித் தனி கோவிலில் வீற்றிருந்து பக்தர்களுக்கு அருள்பாலிக்கின்றனர். ஆடி மாத திருவிழாவில் கடைசி வெள்ளிக்கிழமை அன்று மதியம் 2 மணிக்கு மேல் உற்சவர் அம்மன் ரிஷப வாகனத்தில் வீதி உலா வந்து, மாரியம்மன் கோவிலில் உள்ள கொலு மண்டபத்தில் வீற்றிருந்து பக்தர்களுக்கு அருள்பாலிப்பார். பின்னர் மறுநாள் அதிகாலையில் உற்சவர் அம்மன் மீண்டும் வீதி உலாவாக கோவிலுக்குச் செல்வது வழக்கம். ரிஷப வாகனத்தில் அம்மன் வீதி உலா வரும் இந்த நிகழ்வானது, வருடத்திற்கு ஒரு முறை மட்டுமே நடைபெறும் என்பது இந்த ஆலயத்தின் சிறப்புகளில் ஒன்றாகும்.

இந்தக் கோவிலுக்கு தினமும் வரும் பக்தர்கள், பல்வேறு வகையான நேர்த்திக்கடன்கள் செய்து அம்மனை தரிசனம் செய்கின்றனர். தீராத வயிற்று வலியால் அவதிப்படுபவர்கள், வயிற்றுவலி குணமாக அம்மனை மனதார வேண்டிக்கொள்வர். நோய் குணம் ஆனதும் கோவிலுக்கு வந்து மாவிளக்கு போட்டு, சர்க்கரை பொங்கல் வைத்து அம்மனை வழிபடுவர். அதேபோல கண்வலி, கண்புரை உள்ளிட்ட நோய்கள் தீர வேண்டியும் இங்கு வந்து வழிபடும் பக்தர்களின் எண்ணிக்கை ஏராளம். இந்த வேண்டுதலுக்கு 'வயனம் காக்குதல்' என்று பெயர்.

கண்நோயால் பாதிக்கப்பட்டவர்கள், அந்த நோயில் இருந்து விடுபட வேண்டி இந்தக் கோவிலுக்கு வந்து 11, 21, 31, 41 நாட்கள் என்று தங்குவர். அப்படி வந்து தங்கும் பக்தர்கள், தங்கியிருக்கும் நாள் அனைத்திலும் கோவில் வளாகத்தில் இருந்து அம்மனுக்கு நடைபெறும் அபிஷேகத்தை கண்டுகளித்து, அந்த அபிஷேகத் தீர்த்தத்தை வாங்கி கண்ணில் வைத்துக்கொள்வர். இவ்வாறு தொடர்ச்சியாக செய்து வருவதன் மூலமாக விரைவில் கண்நோய் நீங்கும் என்பது பக்தர்களின் அபார நம்பிக்கை.

அதேபோல குழந்தை வரம், கல்வி பாக்கியம், தொழில் விருத்தி என பல்வேறு காரியங்கள் நிறைவேறவும், அம்மனை மனமுருக வேண்டிக் கொள்கின்றனர். அவ்வாறு வேண்டுதல்கள் நிறைவேறிய உடன் இங்கு வந்து தீச்சட்டி எடுத்தல், மாவிளக்கு போட்டு சர்க்கரை பொங்கல் வைத்தல், கரும்பு தொட்டிலில் குழந்தையை வைத்து எடுத்து வருதல் என தங்களது நேர்த்திக்கடனை அம்மனுக்கு பல்வேறு வகைகளில் காணிக்கையாக செலுத்துகின்றனர். அம்மை நோயால் பாதிக்கப்படுபவர்கள் இந்தக் கோவிலில் வந்து தங்குகின்றனர். பின்னர் அம்மனுக்கு நடைபெறும் அபிஷேக தீர்த்தத்தை தினமும் குடிக்கின்றனர். இதன் காரணமாக படிப்படியாக அம்மை நோய் குறைந்து விடுகிறது. இப்படி அம்மை நோயில் இருந்து விடுபடுபவர்கள், ஆமணக்கு முத்து வாங்கி, அதனை தங்கள் உடல் முழுவதும் தடவியும் சுற்றியும் கோவிலில் உள்ள தொட்டியில் போட்டுச் செல்கின்றனர். இவ்வாறு பக்தர்கள் பல்வேறு வகைகளில் நேர்த்திக்கடன் செலுத்தி இ்ன்னல்கள் நீக்கும் இருக்கன்குடி மாரியம்மனை வழிபட்டுச் செல்கின்றனர்.

நேர்த்திக்கடன்கள்

பக்தர்கள் தங்களுக்கு என்ன குறையோ, அந்த குறையை நிறைவேற்றி தரும்படி அம்மனிடம் வேண்டுகின்றனர். தங்கள் வேண்டுதல்கள் நிறைவேறிய உடன், கயறு குத்துதல், காது குத்துதல், நெய் விளக்கு தீபம் ஏற்றுதல், ஆயிரம் கண் பானை, உருவம் செலுத்துவது, முடி காணிக்கை, மரத்தில் செய்த கை, கால், தொட்டில் பிள்ளை, கண்மலர், ஆமணக்கு முத்து, சேவல், ஆடு, மாடு காணிக்கை என பல்வேறு வகைகளில் அம்மனுக்கு நேர்த்திக்கடன் செலுத்துகின்றனர்.