மின்சாரம் பாய்ந்து தொழிலாளி பலி

தேனியை அடுத்த பொம்மையகவுண்டம்பட்டி ஒண்டி வீரன் நகர் 3-வது தெருவை சேர்ந்தவர் பாபு (வயது 22). கட்டிட தொழிலாளி. நேற்று முன்தினம் இவர் பொம்மையகவுண்டம்பட்டியில் உள்ள ஒரு வீட்டில் கட்டிட வேலையில் ஈடுபட்டு இருந்தார். அப்போது அவர் இரும்பு கம்பி ஒன்றை தூக்கி சென்றதாக கூறப்படுகிறது. அந்த கம்பி மின்சார வயர் மீது உரசியதாக தெரிகிறது. இதில் மின்சாரம் பாய்ந்து பாபு தூக்கி வீசப்பட்டார். உடனே அவரை அக்கம்பக்கத்தினர் மீட்டு சிகிச்சைக்காக தேனி அரசு மருத்துவ கல்லூரி ஆஸ்பத்திரியில் சேர்த்தனர். அங்கு பரிசோதனை செய்த டாக்டர்கள், அவர் ஏற்கனவே இறந்து விட்டதாக கூறினர். இதுகுறித்து அல்லிநகரம் போலீஸ் சப்-இன்ஸ்பெக்டர் மணிகண்டன் வழக்குப்பதிவு செய்து விசாரணை நடத்தி வருகிறார்.