மொபட்டில் இருந்து தவறி விழுந்த தொழிலாளி சாவு

தேனி அருகே பத்ரகாளிபுரத்தை சேர்ந்தவர் உதயசூரியன் (வயது 50). கூலித்தொழிலாளி. கடந்த 25-ந்தேதி இவர், தோட்ட வேலைக்கு சென்று விட்டு மொபட்டில் வீட்டுக்கு வந்து கொண்டு இருந்தார். பத்ரகாளிபுரம் கண்டியம்மன் கோவில் அருகே வந்தபோது, சாலையில் தேங்கி இருந்த மழைநீரில் மொபட் வழுக்கியதில் உதயசூரியன் தவறி கீழே விழுந்தார்.

இதில் தலையில் காயம் அடைந்த அவர் சிகிச்சைக்காக தேனி அரசு மருத்துவ கல்லூரி மருத்துவமனையில் அனுமதிக்கப்பட்டார். இந்நிலையில் மதுரை அரசு மருத்துவமனையில் அனுமதி்க்கப்பட்ட அவர் நேற்று சிகிச்சை பலனின்றி பரிதாபமாக இறந்தார். இந்த சம்பவம் குறித்து அவருடைய மகன் காளிராஜ் கொடுத்த புகாரின் பேரில் பழனிசெட்டிபட்டி போலீசார் வழக்குப்பதிவு செய்து விசாரணை நடத்தி வருகின்றனர்.