மாற்றுத்திறனாளிகளுக்கு சேவை புரிந்தவர்கள் விருது பெற விண்ணப்பிக்கலாம்-கலெக்டர் தகவல்

நெல்லை மாவட்டத்தில் மாற்றுத்திறனாளிகளுக்கு சேவை புரிந்தவர்கள் விருது பெற விண்ணப்பிக்கலாம் என்று கலெக்டர் கார்த்திகேயன் தெரிவித்து உள்ளார்.

இதுகுறித்து அவர் வெளியிட்டுள்ள செய்திக்குறிப்பில் கூறிஇருப்பதாவது:-

விருது

மாற்றுத்திறனாளிகள் நலனுக்காக மாநில அளவில் சிறப்பாக பணிபுரிந்தவர்கள் மற்றும் நிறுவனங்களை தேர்வுக்குழு மூலம் தேர்வு செய்து, அவர்களை முதல்-அமைச்சர் மூலம் ஊக்குவித்து கவுரவிக்கப்படுவதால், அதனை கண்டு தமிழகத்தில் உள்ள ஒவ்வொரு மாற்றுத்திறனாளிகளுக்கான தொண்டு நிறுவனங்கள் மற்றும் மாற்றுத்திறனாளிகள் நலனுக்காக பணிபுரிபவர்கள் மேலும் சிறப்பாக பணியாற்ற வேண்டும் என்ற ஆர்வத்தை ஏற்படுத்தும் பொருட்டு வருகிற ஆகஸ்டு மாதம் 15-ந்தேதி சுதந்திர தின விழா அன்று விருதுகள் வழங்கப்பட உள்ளன.

மாற்றுத்திறனாளிகளுக்கு சேவை புரிந்த சிறந்த தொண்டு நிறுவனத்திற்கு 10 கிராம் தங்க பதக்கம், ரூ.50 ஆயிரம் ரொக்கப்பரிசு மற்றும் சான்றிதழ் வழங்கப்படுகிறது. மாற்றுத்திறனாளிகளுக்கு சேவை புரிந்த சிறந்த டாக்டர், மாற்றுத்திறனாளிகளுக்கு மிக அதிக அளவில் வேலைவாய்ப்பு அளித்த தனியார் நிறுவனம், மாற்றுத்திறனாளிகளுக்கு சேவை புரிந்த சிறந்த சமூக பணியாளர், சிறந்த மாவட்ட மத்திய கூட்டுறவு வங்கி ஆகிய பிரிவில் விருது வழங்கப்படுகிறது. ஒவ்வொரு பிரிவிலும் தகுதியானவர்களுக்கு தலா 10 கிராம் தங்க பதக்கம், சான்றிதழ் வழங்கப்படுகிறது.

26-ந் தேதி

இந்த விருதுகளுக்கு தகுதியானவர்கள் அதற்கான விண்ணப்பங்களை பூர்த்தி செய்து வருகிற 26-ந் தேதி மாலை 5.45 மணிக்குள் மாவட்ட மாற்றுத்திறனாளிகள் நல அலுவலரிடம் நேரிலோ அல்லது தபால் மூலமோ சமர்ப்பிக்க வேண்டும். விருதுக்கு தகுதியான நபர்கள் தேர்வு குழுவால் தேர்வு செய்யப்பட்டு சுதந்திர தின விழாவில் முதல்-அமைச்சரால் விருது வழங்கப்படும்.

இவ்வாறு அதில் கூறப்பட்டு உள்ளது.