விவசாயி குடும்பத்தினரை கட்டிப்போட்டு நகை, பணம் கொள்ளை

செங்கம்

செங்கம் அருகே குப்பநத்தம் பகுதியில் விவசாயி குடும்பத்தினரை கட்டிப்போட்டு நகை மற்றும் பணத்தை முகமூடி அணிந்து வந்த மர்ம நபர்கள் கொள்ளையடித்து சென்றனர்.

விவசாயி

செங்கம் அருகே குப்பநத்தம் பகுதியில் உள்ள சாமுண்டீஸ்வரி அம்மன் கோவில் அருகே வசித்து வருபவர் ராஜவேலு (வயது 65), விவசாயி. இவர் நேற்று இரவு தனது மனைவி தேன்மொழி (50), தாயார் கண்ணம்மா (90) உள்ளிட்டோருடன் வீட்டில் இருந்தார்.

அப்போது முகமூடி அணிந்து வீட்டிற்கு வந்த மர்ம நபர்கள் 3 பேர் ராஜவேலு மற்றும் தேன்மொழியை கட்டிப்போட்டனர்.

நகை, பணம் கொள்ளை

பின்னர் வீட்டில் இருந்து 5 பவுன் நகை மற்றும் ரூ.1 லட்சத்தை கொள்ளையடித்து சென்று விட்டனர்.

இதுகுறித்து அக்கம் பக்கத்தில் இருந்தவர்கள் செங்கம் போலீசாருக்கு தகவல் அளித்தனர். இதனைத்தொடர்ந்து சம்பவ இடத்திற்கு போலீசார் விரைந்து சென்று விசாரணை நடத்தினர்.

மேலும் இதுகுறித்து போலீசார் வழக்குப்பதிவு செய்து முகமூடி அணிந்து வந்த மர்ம நபர்களை தேடி வருகின்றனர்.

இந்த சம்பவத்தால் அந்த பகுதியில் பரபரப்பு ஏற்பட்டது.