பெருமாள் கோவில்களில் சிறப்பு வழிபாடு

வேலாயுதம்பாளையம்,

தேய்பிறை சர்வ ஏகாதசியையொட்டி, தோட்டக்குறிச்சி சேங்கல்மலை வரதராஜ பெருமாளுக்கு பால், தயிர், இளநீர், சந்தனம், மஞ்சள் உள்ளிட்ட பல்வேறு வாசனை திரவியங்களால் அபிஷேகம் நடந்தது. அதனைதொடர்ந்து மலர் மாலைகள் மற்றும் துளசியால் அலங்காரம்செய்யப்பட்டு மாலைகள் அணிவிக்கப்பட்டு, தீபாராதனை காட்டப்பட்டது. பின்னர் சுவாமியை பல்லாக்கில் அமர வைத்து கோவிலை சுற்றி வலம் வந்தனர். இதேபோல் வேலாயுதம்பாளையம் பகுதியில் உள்ள பெருமாள் கோவில்களில் தேய்பிறை சர்வ ஏகாதசியையொட்டி சிறப்பு பூஜை நடந்தது. இதில் திரளான பக்தர்கள் கலந்து கொண்டு சாமி தரிசனம் செய்தனர்.

நொய்யல் அருகே கோம்புப்பாளையத்தில் உள்ள ஸ்ரீதேவி, பூதேவி சமேத ஸ்ரீனிவாச பெருமாள் கோவிலில் வைகாசி மாத ஏகாதசியை முன்னிட்டு சிறப்பு அபிஷேக ஆராதனை நடைபெற்றது. இதையொட்டி சுவாமிகளுக்கு பால், தயிர், பன்னீர், இளநீர் உள்ளிட்ட 18 வகையான வாசனை திரவியங்களால் அபிஷேகம் நடைபெற்றது. தொடர்ந்து பல்வேறு மலர்கள் மற்றும் துளசி மாலைகளால் அலங்காரம் செய்யப்பட்டு தீபாராதனை காட்டப்பட்டது. பின்னர் சிறப்பு அலங்காரத்தில் ஸ்ரீதேவி, பூதேவி சமேத ஸ்ரீனிவாச பெருமாள் பக்தர்களுக்கு காட்சி அளித்தார்.