கள்ளக்குறிச்சி மாவட்டத்தில் நாளை நடைபெறும் டி என் பி எஸ் சி குரூப் 2 2 ஏ தேர்வை 19612 பேர் எழுதுகிறார்கள்

கள்ளக்குறிச்சி

ஆய்வு கூட்டம்

கள்ளக்குறிச்சி மாவட்ட கலெக்டர் அலுவலக கூட்டரங்கில் டி.என்.பி.எஸ்.சி தேர்வு குரூப்-2 மற்றும் குரூப்-2ஏ தேர்வுக்கான முன்னேற்பாடு பணிகள் குறித்த ஆய்வுகூட்டம் கலெக்டர் ஸ்ரீதர் தலைமையில் மாவட்ட போலீஸ்சூப்பிரண்டு செல்வக்குமார் முன்னிலையில் நடைபெற்றது.

கூட்டத்தில் கலெக்டர் பேசியதாவது:-

66 தேர்வு மையங்கள்

கள்ளக்குறிச்சி மாவட்டத்தில் தமிழ்நாடு அரசு பணியாளர் தேர்வாணையம் மூலம் குரூப்-2 மற்றும் 2-ஏ நேர்முகத் தேர்வு பதவிகள் மற்றும் நேர்முகத் தேர்வு அல்லாத பதவிகளுக்கான முதல்நிலைத் தேர்வு நாளை(சனிக்கிழமை) நடைபெற உள்ளது. இதையொட்டி மாவட்ட நிர்வாகத்தின் சார்பில் தேர்வுகள் சுமூகமாக நடத்திடவும், தேவையான பாதுகாப்பு நடவடிக்கைகள் மற்றும் இதர முன்னேற்பாடு பணிகள் மேற்கொள்ளப்பட்டுள்ளன.

மாவட்டத்தில் உள்ள 5 தாலுகாக்களிலும் 66 தேர்வு மையங்களில் 19 ஆயிரத்து 612 விண்ணப்பதாரர்கள் தேர்வு எழுத உள்ளனர். இத்தேர்வில் முறைகேடுகளை தடுக்கும் வகையில் துணை கலெக்டர் நிலையில் 5 பறக்கும் படை அலுவலர்கள் மற்றும் தாசில்தார் அல்லது துணை தாசில்தார் நிலையில் உள்ள அலுவலர்கள் தலைமையில் 14 சுற்றுக்குழு அலுவலர்கள் நியமிக்கப்பட்டுள்ளனர்.

கூடுதல் பஸ்வசதி

தேர்வுப் பொருட்கள் பாதுகாக்கப்பட உள்ள மாவட்ட, சார்நிலை கருவூலங்களுக்கும், சுற்று குழுக்களுக்கும், தேர்வு நடைபெறவுள்ள 66 தேர்வு மையங்கள் என மொத்தம் 90 காவல்துறை அலுவலர்கள் பாதுகாப்பு மற்றும் வழிக்காவல் பணிகளுக்காக நியமனம் செய்யப்பட்டுள்ளனர்.

தேர்வு நடைபெறும் நாளன்று தேர்வர்கள் உரிய நேரத்தில் தேர்வு மையங்களுக்கு செல்ல ஏதுவாக காலை 5 மணிமுதல் மாலை 3 மணிவரை தமிழ்நாடு அரசு போக்குவரத்துக்கழகம் மூலம் கூடுதல் பஸ் வசதி செய்யவும், தடையின்றி மின்சாரம் வினியோகம் செய்யவும் சம்பந்தப்பட்ட அதிகாரிகளுக்கு அறிவுரை வழங்கப்பட்டுள்ளது.

தொலைபேசி எண்கள்

தேர்வு எழுதும் நபர்கள் உரிய நேரத்தில் தேர்வு மையத்துக்கு வர வேண்டும். தேர்வு எழுத கருப்பு நிற பந்துமுனை பேனாவை மட்டுமே பயன்படுத்த வேண்டும். தேர்வு மையம் மற்றும் தேர்வு தொடர்பான இதர சந்தேகங்களுக்கு தமிழ்நாடு அரசுப்பணியாளர் தேர்வாணைய உதவி மைய தொலைபேசி எண்கள் 044-25300338, 25300339, 25300340, 18004190958 மற்றும் Grievance.tnpsc@tn.gov.in என்ற மின் அஞ்சல் முகவரி மூலமாக தொடர்பு கொண்டு அறிந்துகொள்ளலாம்.

இவ்வாறு அவர் கூறினார்.

கூட்டத்தில் மாவட்ட வருவாய் அலுவலர் விஜய்பாபு, தமிழ்நாடு அரசு பணியாளர் தேர்வாணையத்தின் கள்ளக்குறிச்சி மாவட்ட மேற்பார்வையாளர் சசிகுமார், கலெக்டரின் நேர்முக உதவியாளர்(பொது) சுரேஷ், திருக்கோவிலூர் கோட்டாட்சியர் யோகஜோதி, மாவட்ட வழங்கல் அலுவலர் ஷெர்லிஏஞ்சலா, உதவி இயக்குனர் (ஊராட்சிகள்) ரெத்தினமாலா, தாசில்தார்கள், வருவாய்த்துறை மற்றும் அரசு அலுவலர்கள் கலந்துகொண்டனர்.