இறந்த யானைகளுக்கு 21-ம் நாள் காரியம் செய்த கிராம மக்கள்

தர்மபுரி மாவட்டம் மாரண்டஅள்ளி அருகே காளிகவுண்டன் கொட்டாய் கிராமத்தில் கடந்த 20 நாட்களுக்கு முன்பு விவசாய நிலத்துக்கு உணவு மற்றும் தண்ணீர் தேடி சென்ற ஒரு பெண் யானை மற்றும் 2 ஆண் யானை என 3 காட்டு யானைகள் மின்சாரம் தாக்கி இறந்தன. இந்த சம்பவம் தர்மபுரி மாவட்டத்தில் பெருத்த சோகத்தை ஏற்படுத்தியது.

இந்த நிலையில் நேற்று யானைகள் இறந்து 21-வது நாளையொட்டி காளிகவுண்டன் கொட்டாயில் கிராம மக்கள் ஒன்றிணைந்து 21-வது நாள் காரியத்தை நடத்தினர். அதன்படி யானைகள் புதைக்கப்பட்ட குழியின் மீது பூக்களால் அலங்கரித்தனர். பின்னர் யானைக்கு விருப்ப உணவுகளான வாழைப்பழம், கரும்பு, தேங்காய், திராட்சை பழம், ஆரஞ்சு பழம், மாம்பழம், அன்னாசி பழம், பலாப்பழம் உள்ளிட்டவைகளை வைத்து படையலிட்டனர்.