மாற்றுத்திறனாளிகள் குறைதீர்க்கும் கூட்டம்

சிவகங்கை கலெக்டர் அலுவலகத்தில் மாற்றுத்திறனாளிகளுக்கான சிறப்பு குறை தீர்க்கும் நாள் கூட்டம் மாவட்ட கலெக்டர் மதுசூதன்ரெட்டி தலைமையில் நடைபெற்றது. கூட்டத்தில் 3 மாற்றுத்திறனாளிகளுக்கு தலா ரூ.50,000 மதிப்பீட்டில் ஆவின் பால்உற்பத்தி பொருட்கள் விற்பனை செய்வதற்காக நிதியுதவியும், ஒரு மாற்றுத்திறனாளிக்கு ரூ.99,999 மதிப்பீட்டிலான பேட்டரியால் இயங்கும் சிறப்பு சக்கர நாற்காலியும், இரண்டு மாற்றுத்திறனாளிகளுக்கு தலா ரூ.9,792 மதிப்பீட்டிலான மோட்டார் பொருத்தப்பட்ட தையல் எந்திரங்களும், ஒரு மாற்றத்திறனாளிக்கு ரூ.9,050 மதிப்பீட்டில் மூன்று சக்கர சைக்கிள் என மொத்தம் 7 பயனாளிகளுக்கு ரூ.2 லட்சத்து 78 ஆயிரத்து 633 மதிப்பீட்டிலான நலத்திட்ட உதவிகளை கலெக்டர் வழங்கினார். இந்நிகழ்ச்சியில் மாவட்ட மாற்றுத்திறனாளிகள் நலத்துறை அலுவலர் கதிர்வேல் மற்றும் அரசு அலுவலர்கள் கலந்து கொண்டனர்.