நாய் குறுக்கே வந்ததால் மோட்டார் சைக்கிளில் இருந்து தவறி விழுந்து தொழிலாளி பலி

அல்லிநகரம் வள்ளி நகரைச் சேர்ந்தவர் முத்துராஜ் (வயது 34). கூலித்தொழிலாளி. இவர், வீட்டில் இருந்து மோட்டார்சைக்கிளில் தேனிக்கு சென்று கொண்டிருந்தார். வீட்டில் இருந்து சிறிது தூரம் சென்றதும் சாலையில் நாய் ஒன்று குறுக்கே வந்ததால் திடீரென பிரேக் போட்டார். இதில் மோட்டார்சைக்கிளில் இருந்து தவறி கீழே விழுந்த அவர் படுகாயமடைந்தார். இதையடுத்து அக்கம்பக்கத்தினர் அவரை மீட்டு சிகிச்சைக்காக அரசு மருத்துவமனைக்கு அனுப்பி வைத்தனர். அங்கு சிகிச்சை பலனின்றி அவர் பரிதாபமாக இறந்தார். இதுகுறித்து அல்லிநகரம் போலீஸ் சப்-இன்ஸ்பெக்டர் பாண்டியம்மாள் வழக்குப்பதிவு செய்து விசாரணை நடத்தி வருகிறார்.