கல்லூரி மாணவிகள் விழிப்புணர்வு ஊர்வலம்

பாலக்கோடு

பாலக்கோடு அரசு மகளிர் மேல்நிலைப்பள்ளியில் பெண்களுக்கு எதிரான வன்முறை ஒழிப்பு தினத்தையொட்டி விழிப்புணர்வு ஊர்வலம் போலீஸ் துணை சூப்பிரண்டு சிந்து தலைமையில் நடைபெற்றது. சக்தி கைலாஷ் கல்லூரி மாணவிகள் பங்கேற்ற இந்த விழிப்புணர்வு ஊர்வலத்தை, துணை போலீஸ் சூப்பிரண்டு சிந்து கொடியசைத்து தொடங்கிவைத்தார்.

கல்லூரி மாணவிகள் 500-க்கும் மேற்பட்டோர், பாலக்கோடு அரசு மகளிர் மேல்நிலைப்பள்ளியில் இருந்து ஊர்வலமாக புறப்பட்டு, தக்காளி மண்டி, கடைவீதி, பஸ் நிலையம், எம்.ஜி.ரோடு, பைபாஸ் சாலை வழியாக சென்று பள்ளியை மீண்டும் சென்றடைந்தனர்.

ஊர்வலத்தின் போது, பெண்களுக்கு எதிரான வன்முறைகளை தடுப்பது குறித்த விழிப்புணர்வு வாசகங்களை அடங்கிய பதாகைகளை கையில் ஏந்தியபடி மாணவிகள் சென்றனர். இதில் பாலக்கோடு போலீஸ் இன்ஸ்பெக்டர் தவமணி, சப்-இன்ஸ்பெக்டர்கள் முருகன், ராகவி, கல்லூரி பேராசிரியர்கள், போக்குவரத்து போலீசார் திரளாக கலந்து கொண்டனர்.