திருவண்ணாமலை
மரம் வெட்டும் கத்தியால் மனைவிக்கு வெட்டு-தப்பி ஓடிய கணவன் கைது
|நடத்தையில் சந்தேகப்பட்டு மனைவியை மரம் வெட்டும் கத்தியால் வெட்டிய கணவனை போலீசார் கைது செய்தனர்.
செய்யாறு
நடத்தையில் சந்தேகப்பட்டு மனைவியை மரம் வெட்டும் கத்தியால் வெட்டிய கணவனை போலீசார் கைது செய்தனர்.
மரம் வெட்டும் தொழிலாளி
செய்யாறு தாலுகா செங்கட்டான்குண்டில் கிராமத்தைச் சேர்ந்த மல்லிகா (வயது 54). மரம் வெட்டும் கூலி தொழிலாளி. கடந்த 20 வருடங்களுக்கு முன்பு கணவர் சின்னராஜ் இறந்த நிலையில் மல்லிகா தனது குடிசை வீட்டில் தனியாக வசித்து வந்தார்.
கடந்த ஓராண்டுக்கு முன்பு மரம் வெட்ட சென்ற இடத்தில் கீழ்வெள்ளியூர் கிராமத்தைச் சேர்ந்த தசரதன் என்பவருடன் பழக்கம் ஏற்பட்டுள்ளது. பின்னர் இருவரும் திருமணம் செய்து கொண்டுள்ளனர். தசரதனுக்கு ஏற்கனவே திருமணம் ஆகி விட்டது. அவரது மனைவி ஜீவா. இவர்களுக்கு மாரிமுத்து, மணி என்ற மகன்களும் பரமேஸ்வரி என்ற மகளும் உள்ளனர்.
மல்லிகாவை தசரதன் 2-வதாக திருமணம் செய்ததையடுத்து அவரையும் மகன்கள், மகளையும் விட்டு ஜீவா பிரிந்து சென்று விட்டார்.
நடத்தையில் சந்தேகம்
அதனைத் தொடர்ந்து தசரதன் தனது குழந்தைகளுடன் மல்லிகா வீட்டில் வசித்து வந்துள்ளார். கடந்த 3 மாதங்களாகவே மல்லிகாவின் நடத்தையில் சந்தேகமடைந்த தசரதன் அடிக்கடி குடித்து விட்டு வந்து தகராறு செய்து தாக்கியுள்ளார். கடந்த 26-ந் தேதி இரவு கிராமத்தில் திருவிழா நடந்து கொண்டிருந்தது. அப்போது குழந்தைகள் அனைவரும் திருவிழாவுக்கு சென்று விட்டனர்.
வீட்டில் மல்லிகா மட்டும் தனியாக இருந்தார். இந்த நிலையில் இரவு 11 மணி அளவில் வீட்டிற்கு வந்த தசரதன் மரம் வெட்டும் கத்தியால் மனைவி மல்லிகாவை கழுத்து பகுதியில் சரமாரியாக வெட்டியதாக தெரிகிறது. அவரது அலறல் சத்தம் கேட்டு அருகில் இருந்தவர்கள் அங்கு ஓடி வந்தனர்.
அதற்குள் தசரதன் அங்கிருந்து தப்பிச்சென்று விட்டார். இதனை தொடர்ந்து ரத்த வெள்ளத்தில் கிடந்த மல்லிகாவை 108 ஆம்புலன்ஸ் மூலம் மீட்டு செய்யாறு அரசு மருத்துவமனைக்கு அழைத்து சென்றனர். அங்கு முதலுதவி சிகிச்சை அளிக்கப்பட்டு மேல் சிகிச்சைக்காக அவர் வேலூர் அரசு மருத்துவமனைக்கு கொண்டு செல்லப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது.
கைது
அங்கு மல்லிகாவிடம் போலீசார் விசாரணை நடத்தினர். அதன் அடிப்படையிலும் மல்லிகாவிடம் பெற்ற புகாரின்பேரிலும் செய்யாறு போலீஸ் இன்ஸ்பெக்டர் பாலு வழக்கு பதிவு செய்து விசாரணை மேற்கொண்டு வருகிறார். இந்த நிலையில் தலைமறைவாக இருந்த தசரதனை மோரணம் போலீசார் கைது செய்து செய்யாறு கோர்ட்டில் ஆஜர் படுத்தி வேலூர் மத்திய சிறையில் அடைத்தனர்.