உலக நன்மைக்காக 1,008 சங்காபிஷேகம்

நத்தம் கோவில்பட்டி கைலாசநாதர் கோவிலில் கார்த்திகை மாத 2-வது சோமவார பூஜை நேற்று நடந்தது. இதையொட்டி மூலவர் கைலாசநாதர்-செண்பகவள்ளி அம்மனுக்கு பால், பழம், பன்னீர், விபூதி, சந்தனம், புஷ்பம், இளநீர், பஞ்சாமிர்தம், உள்ளிட்ட 16 வகையான அபிஷேகங்களும், அலங்காரமும், தீபாராதனைகளும் நடந்தது. முன்னதாக உலக நன்மை வேண்டி கோவில் வளாகத்தில் லிங்க வடிவில் 1,008 சங்குகள் அமைக்கப்பட்டு அதில் வில்வ இலைகள், பூக்கள் ஆகியவற்றால் அலங்கரிக்கப்பட்டிருந்தது. தொடர்ந்து 108 மூலிகைகளால் ஆன பொருட்கள் யாகத்தில் பயன்படுத்தப்பட்டது. சிவாச்சாரியார்களின் வேத மந்திரங்கள் முழங்க பூஜைகள் நடந்தது. இதில் சுற்றுவட்டாரத்தை சேர்ந்த ஏராளமான பக்தர்கள் கலந்து கொண்டு சாமி தரிசனம் செய்தனர்.