குதுப்மினார் கட்டப்பட்டிருக்கும் நிலத்தின் மீது உரிமை கோரிய வழக்கில் தீர்ப்பு ஒத்திவைப்பு!

புது டெல்லி,

டெல்லியில் உள்ள புராதான சின்னமான குதுப்மினார் வளாகத்தில் வழிபாடு நடத்த உரிமை வழங்க வேண்டும் என்ற கோரிக்கை தொடர்பான மனு மீதான விசாரணை இன்று தலைநகர் டெல்லியில் உள்ள சாகேத் கோர்ட்டில் நடைபெற்றது.

27 இந்து தெய்வங்கள் மற்றும் ஜெயின் கோவில்களை இடித்து குதுப்மினார் கட்டப்பட்டதாக இந்து அமைப்பினர் கூறுகின்றனர். எனவே, இங்கு வழிபாடு நடத்த அனுமதிக்க வேண்டும். இது தொடர்பாக இந்து அமைப்பு சார்பில் நீதிமன்றத்தில் தாக்கல் செய்யப்பட்ட மனு இன்று விசாரணைக்கு வந்தது.

இந்த நிலையில், குதுப் மினார் கட்டப்பட்டிருக்கும் நிலத்தின் மீது உரிமை கோரி குன்வர் மகேந்திரத்வாஜ் பிரதாப் சிங் என்பவரால் முன்வைக்கப்பட்ட ஒரு தலையீட்டு விண்ணப்பம் இன்று விசாரணைக்கு வந்தது.

அந்த மனுவில் மகேந்திரத்வாஜ் பிரதாப் சிங், தான் ஆக்ராவின் ஐக்கிய மாகாணங்களின் வாரிசு என்று கூறியிருந்தார். குதுப்மினாரின் சொத்து தனக்குச் சொந்தமானது. 1947 க்குப் பிறகு அரசாங்கம் அவரது சொத்துக்களை ஆக்கிரமித்தது மற்றும் அவரிடம் தனியுரிமை கவுன்சில் பதிவுகள் உள்ளன. எனவே அங்குள்ள மசூதியுடன் குதுப்மினாரையும் தனக்குத் தர வேண்டும் என்று த்வாஜ் பிரதாப் சிங் கோரினார்.

இந்த வழக்கில் மகேந்திரத்வாஜை மூன்றாவது நபராக ஆக்குவது குறித்து செப்டம்பர் 17-ம் தேதி நீதிமன்றம் முடிவெடுக்கும். அதன் பிறகு மீண்டும் வழிபாட்டு உரிமை விவகாரம் விசாரிக்கப்படும்.

மகேந்திரத்வாஜ் வழக்கின் தீர்ப்புக்குப் பிறகு, செப்டம்பர் 17-க்குப் பிறகு, வழிபாட்டு உரிமை தொடர்பான வழக்கு மீண்டும் விசாரணைக்கு வரும் என்று கோர்ட்டு தெரிவித்தது.