குஜராத்தில் பாஜகவுக்கும் காங்கிரசுக்கும் இடையேதான் தேர்தல் போர் - பாஜக

அகமதாபாத்,

குஜராத்தில் நடப்பு ஆண்டு இறுதியில் சட்டசபை தேர்தல் நடைபெற உள்ளது. கடந்த 27 ஆண்டுகளாக பாஜக ஆட்சியில் உள்ள நிலையில், இந்த முறை ஆம் ஆத்மி கட்சி ஆட்சியை பிடிக்கும் முனைப்புடன் செயல்பட்டு வருகிறது. இந்த நிலையில் குஜராத்தில் பாஜகவுக்கும் காங்கிரசுக்கும் இடையேதான் தேர்தல் போர் என்று குஜராத் பாஜக பொதுச் செயலாளர் பிரதீப்சிங் வகேலா தெரிவித்துள்ளார்.

பாஜக தேசியத் தலைவர் ஜேபி நட்டா இரண்டு நாள் பயணமாக குஜராத் செல்கிறார். நாளை அவர், பல்வேறு நிகழ்ச்சிகளில் பங்கேற்க உள்ளதாகவும் உள்ளூர் தலைவர்களுடன் சந்திப்புகளை நடத்த உள்ளதாகவும் பிரதீப்சிங் வகேலா தெரிவித்தார்.

இதுகுறித்து பிரதீப்சிங் வகேலா கூறும்போது, "குஜராத்தில் பாஜகவுக்கும் காங்கிரசுக்கும் இடையேதான் போட்டி. குஜராத்தில் கடந்த காலங்களில் பல கட்சிகள் தேர்தலில் போட்டியிட வந்தன. ஆனால் அவை எதுவும் பிழைக்கவில்லை. இந்த முறையும் காங்கிரசுக்கும் பாஜகவுக்கும் இடையேதான் போட்டி. ஆனால் இந்த முறை காங்கிரஸ் மிகவும் பின்தங்கியுள்ளது. எனவே இந்த தேர்தலில் பாஜக அதிக வாக்கு வித்தியாசத்தில் வெற்றி பெறும். நாங்கள் அதிக இடங்களைப் பெறுவோம்.

பாஜக தேசிய தலைவர் ஜே.பி. நட்டா இன்று இரவு குஜராத் வருகிறார். நாளை முதல், ஜே.பி. நட்டா கலந்துகொள்ளும் பல நிகழ்ச்சிகள் வரிசையாக உள்ளன. நமோ கிசான் பஞ்சாயத்து, மேயர் உச்சி மாநாடு, ராஜ்கோட்டில் ஜன் பிரதிநிதி சம்மேளனம், மோர்பியில் ஒரு பெரிய ரோட்ஷோ மற்றும் காந்திநகரில் வீரஞ்சலி நிகழ்ச்சி ஆகியவற்றில் ஜே.பி.நட்டா பங்கேற்பார்" என்று கூறினார்.

ஜேபி நட்டா பங்கேற்கும் மேயர் உச்சி மாநாட்டில் 18 மாநிலங்களைச் சேர்ந்த 121 மேயர்கள் மற்றும் துணை மேயர்கள் பங்கேற்கின்றனர். இந்த உச்சிமாநாட்டில் பிரதமர் நரேந்திர மோடி காணொலி காட்சி மூலம் உரையாற்றுவார். தொடர்ந்து நாளை ஜேபி நட்டா காந்திநகருக்கு அருகிலுள்ள கிசான் மோர்ச்சா நிகழ்வில் மின்-பைக்குகளை கொடியசைத்து தொடங்கி வைப்பார். மேலும் காந்திநகரில் உள்ள கட்சி தலைமையகத்தில் மாநில பாஜக தலைவர்கள் மற்றும் தொழிலாளர்களுடன் ஒரு முக்கியமான சந்திப்பை நடத்துகிறார்.