பெண்கள் பிரிமீயர் லீக் இறுதிப்போட்டி: கோப்பையை வெல்லப்போவது யார்..?

மும்பை,

இந்திய கிரிக்கெட் வாரியம் சார்பில் ஐ.பி.எல். போட்டியை போன்று பெண்களுக்கான பிரிமீயர் லீக் போட்டி அறிமுகம் செய்யப்பட்டு இருக்கிறது. இதன்படி முதலாவது பெண்கள் பிரிமீயர் லீக் 20 ஓவர் கிரிக்கெட் போட்டி மும்பையில் கடந்த 4-ந் தேதி தொடங்கியது. இதில் மும்பை இந்தியன்ஸ், குஜராத் ஜெயன்ட்ஸ், டெல்லி கேப்பிட்டல்ஸ், பெங்களூரு ராயல் சேலஞ்சர்ஸ், உ.பி.வாரியர்ஸ் ஆகிய 5 அணிகள் பங்கேற்றன.

இதில் ஒவ்வொரு அணியும் மற்ற அணிகளுடன் தலா 2 முறை லீக் ஆட்டத்தில் மோதின. லீக் சுற்று முடிவில் டெல்லி கேப்பிட்டல்ஸ், மும்பை இந்தியன்ஸ் அணி தலா 12 புள்ளிகள் பெற்றாலும் ரன்-ரேட் அடிப்படையில் முன்னிலை பெற்ற டெல்லி கேப்பிட்டல்ஸ் அணி முதலிடம் பிடித்து நேரடியாக இறுதிப்போட்டிக்கு முன்னேறியது. மும்பை அணி 2-வது இடத்தையும், உ.பி.வாரியர்ஸ் 3-வது இடத்தையும் பிடித்து பிளே-ஆப் சுற்றுக்குள் நுழைந்தன. பெங்களூரு ராயல் சேலஞ்சர்ஸ், குஜராத் ஜெயன்ட்ஸ் அணிகள் முறையே 4-வது, 5-வது இடங்களை பிடித்து வெளியேறின.

நேற்று முன்தினம் இரவு நடந்த வெளியேற்றுதல் சுற்று (எலிமினேட்டர்) போட்டியில் மும்பை இந்தியன்ஸ் அணி 72 ரன்கள் வித்தியாசத்தில் உ.பி.வாரியர்சை தோற்கடித்து இறுதிப்போட்டிக்குள் அடியெடுத்து வைத்தது. முதலில் ஆடிய மும்பை அணி 4 விக்கெட்டுக்கு 182 ரன்கள் குவித்தது. அடுத்து ஆடிய உ.பி.வாரியர்ஸ் அணி 17.4 ஓவர்களில் 110 ரன்னில் சுருண்டு விடைபெற்றது. 

இறுதிப்போட்டியில் மும்பை-டெல்லி

பெண்கள் பிரிமீயர் லீக் கோப்பை யாருக்கு? என்பதை நிர்ணயிக்கும் இறுதிப்போட்டி மும்பை பிரபோர்ன் ஸ்டேடியத்தில் இன்று (ஞாயிற்றுக்கிழமை) இரவு நடக்கிறது. இதில் ஹர்மன்பிரீத் கவுர் தலைமையிலான மும்பை இந்தியன்ஸ்-மெக் லானிங் தலைமையிலான டெல்லி கேப்பிட்டல்ஸ் அணிகள் மோதுகின்றன.

மும்பை அணியை பொறுத்தமட்டில் முதல் 5 லீக் ஆட்டங்களில் தொடர்ச்சியாக வெற்றி கண்டு ஆதிக்கம் செலுத்தியது. அதன் பிறகு 2 ஆட்டங்களில் தோற்று சற்று சரிவை சந்தித்த அந்த அணி வெளியேற்றுதல் சுற்றில் உ.பி.வாரியர்சை எளிதில் வீழ்த்திய உற்சாகத்துடன் இந்த போட்டியில் களம் இறங்குகிறது.

மும்பை அணியில் பேட்டிங்கில் கேப்டன் ஹர்மன்பிரீத் கவுர் (244 ரன்கள்), விக்கெட் கீப்பர் யாஸ்திகா பாட்டியாவும் (210 ரன்கள்), பந்து வீச்சில் சாய்கா இஷாக் (15 விக்கெட்), அமெலி கெர் (13), இசி வோங்கும் (12), ஆல்-ரவுண்டராக நாட் சிவெர் (272 ரன்கள், 10 விக்கெட்), ஹெய்லி மேத்யூஸ்சும் (258 ரன்கள், 13 விக்கெட்) அசத்தி வருகிறார்கள். இங்கிலாந்தை சேர்ந்த வேகப்பந்து வீச்சாளரான இசி வோங் உ.பி.வாரியர்சுக்கு எதிரான முந்தைய ஆட்டத்தில் 'ஹாட்ரிக்' விக்கெட் வீழ்த்தி அனைவரது கவனத்தையும் ஈர்த்தார் என்பது கவனிக்கத்தக்கது. 

மெக் லானிங்

டெல்லி அணியை பொறுத்தமட்டில் பேட்டிங்கில் ரன் குவிப்பில் முதலிடத்தில் இருக்கும் கேப்டன் மெக் லானிங் (310 ரன்கள்), ஷபாலி வர்மாவும் (241), பந்து வீச்சில் ஷிகா பாண்டே (10 விக்கெட்), ஜெஸ் ஜோனசென் (8 விக்கெட்), தாரா நோரிஸ்சும் (7 விக்கெட்) வலுசேர்க்கிறார்கள். ஆல்-ரவுண்டர்களாக மரிஜானே காப் (159 ரன்கள், 9 விக்கெட்), அலிஸ் கேப்சி (159 ரன்கள், 6 விக்கெட்) ஆகியோர் கலக்குகின்றனர்.

சமபலம் வாய்ந்த இந்த இரண்டு அணிகளும் கோப்பையை வசப்படுத்த எல்லா வகையிலும் வரிந்து கட்டும் என்பதால் இந்த போட்டியில் விறுவிறுப்புக்கு பஞ்சம் இருக்காது. இரு அணிகளுக்கும் இடையேயான லீக் ஆட்டத்தில் தலா ஒரு வெற்றி பெற்றுள்ளன. ஒரு ஆட்டத்தில் மும்பை அணி 8 விக்கெட் வித்தியாசத்திலும், மற்றொரு ஆட்டத்தில் டெல்லி அணி 9 விக்கெட் வித்தியாசத்திலும் வெற்றி பெற்று இருந்தன.

இந்த போட்டியில் கோப்பையை கைப்பற்றும் அணிக்கு ரூ.6 கோடியும், 2-வது இடம் பெறும் அணிக்கு ரூ.3 கோடியும் பரிசாக வழங்கப்படுகிறது.

இரவு 7.30 மணிக்கு...

இன்றைய போட்டிக்கான இரு அணிகளின் உத்தேச பட்டியல் வருமாறு:-

மும்பை இந்தியன்ஸ்: யாஸ்திகா பாட்டியா, ஹெய்லி மேத்யூஸ், நாட் சிவெர், ஹர்மன்பிரீத் கவுர் (கேப்டன்), அமெலி கெர், பூஜா வஸ்ட்ராகர், ஹூமைரா காஸி, அமன்ஜோத் கவுர், இசி வோங், ஜிந்திமணி கலிதா, சாய்கா இஷாக்.

டெல்லி கேப்பிட்டல்ஸ்: மெக் லானிங் (கேப்டன்), ஷபாலி வர்மா, அலிஸ் கேப்சி, ஜெமிமா ரோட்ரிக்ஸ், மரிஜானே காப், ஜெஸ் ஜோனசென், தானியா பாட்டியா, அருந்ததி ரெட்டி, ராதா யாதவ், ஷிகா பாண்டே, பூனம் யாதவ் அல்லது தாரா நோரிஸ்.

இரவு 7.30 மணிக்கு தொடங்கும் இந்த போட்டியை ஸ்போர்ட்ஸ் 18, கலர்ஸ் தமிழ் ஆகிய சேனல்கள் நேரடி ஒளிபரப்பு செய்கின்றன.