திமுக கூட்டணியியில் ஐ.யூ.எம்.எல். கட்சிக்கு ஒதுக்கப்பட்ட 3 தொகுதிகள் வெளியீடு

சென்னை,

தமிழகத்தில் ஏப்ரல் மாதம் 6-ம் தேதி நடைபெற உள்ள சட்டப்பேரவைத் தேர்தலை முன்னிட்டு, அதிமுக மற்றும் திமுக கட்சிகளின் சார்பில் முக்கியக் கூட்டணிக் கட்சிகளுடனான தொகுதி பங்கீட்டுப் பேச்சுவார்த்தை தொடர்ந்து பல கட்டங்களாக நடைபெற்று வருகிறது.

இதன்படி தி.மு.க தலைமையிலான கூட்டணியில், காங்கிரஸ், ம.தி.மு.க, விடுதலை சிறுத்தை கட்சி, மார்க்சிஸ்ட் கம்யூனிஸ்ட் கட்சி, இந்திய கம்யூனிஸ்ட் கட்சி, மனித நேய மக்கள் கட்சி, இந்திய யூனியன் முஸ்லீம் லீக், தமிழக வாழ்வுரிமை கட்சி, ஆதி தமிழர் பேரவை உள்ளிட்டவை இடம்பெற்றுள்ளன.

இதில் இந்திய யூனியன் முஸ்லிம் லீக் கட்சிக்கு திமுக கூட்டணியில் 3 தொகுதிகள் ஒதுக்கப்படுவதாக அறிவிக்கப்பட்டிருந்தது. இதையடுத்து இன்று சென்னை அண்ணா அறிவாலயத்தில் திமுக மற்றும் இந்திய யூனியன் முஸ்லிம் லீக் கட்சி இடையே நடந்த இறுதிக்கட்ட பேச்சுவார்த்தையில் அக்கட்சிக்கு ஒதுக்கப்பட்டுள்ள தொகுதிகள் எவை என்பது முடிவு செய்யப்பட்டுள்ளது.

அதன்படி கடையநல்லூர், வாணியம்பாடி, சிதம்பரம் ஆகிய 3 தொகுதிகளில் இந்திய யூனியன் முஸ்லிம் லீக் கட்சி திமுக சார்பில் போட்டியிடும் என்று அறிவிக்கப்பட்டுள்ளது.