அடையாளம் தெரியாத வாகனம் மோதி தொழிலாளி சாவு

ராணிப்பேட்டை மாவட்டம் ஆற்காடு பைபாஸ் சாலையில் நேற்று முன்தினம் இரவு ஒருவர் சாலையை கடக்க முயன்றுள்ளார். அப்போது அவர் மீது அடையாளம் தெரியாத வாகனம் மோதி உள்ளது. இதில் அவர் சம்பவ இடத்திலேயே பரிதாபமாக உயிரிழந்தார்.

இது குறித்த தகவலின் பேரில் ஆற்காடு டவுன் போலீசார் சம்பவ இடத்திற்கு சென்று பிணத்தை கைப்பற்றி பிரேத பரிசோதனைக்காக ஆற்காடு அரசு மருத்துவமனைக்கு அனுப்பி வைத்தனர். மேலும் இதுகுறித்து போலீசார் விசாரணை நடத்தியதில் விபத்தில் இறந்தவர் திருவண்ணாமலை மாவட்டம் ஆரணி அம்பேத்கர் நகர் பகுதியை சேர்ந்த முத்துவேல் (வயது 53) என்பதுதெரிய வந்தது.

இவர் ஆரணி மார்க்கெட்டில் மூட்டை தூக்கும் தொழில் செய்து வந்தார். கடந்த 9-ந் தேதி வேலைக்கு சென்றவர் மீண்டும் வீடு திரும்பவில்லை. இந்த நிலையில் விபத்தில் இறந்துள்ளார். இதுகுறித்து ஆற்காடு டவுன் போலீசார் விசாரணை நடத்தி வருகின்றனர்.