திராவகம் குடித்து தொழிலாளி தற்கொலை

திருவட்டார், 

திருவட்டார் அருகே உள்ள செட்டிச்சார்விளை தாணிக்காவிளையை சேர்ந்தவர் செபஸ்தியான் (வயது43), தொழிலாளி. இவருக்கு இன்னும் திருமணமாகவில்லை. செபஸ்தியான் நோயால் பாதிக்கப்பட்டு சிகிச்சை பெற்று வந்தார். இதனால் மனமுடைந்த அவர் நேற்று முன்தினம் வீட்டில் ரப்பர் பால் உறைய பயன்படுத்தும் திராவகம் குடித்து மயங்கி விழுந்தார். உடனே அவரை உறவினர்கள் மீட்டு தக்கலை அரசு மருத்துவமனைக்கு கொண்டு சென்றனர். அங்கிருந்து மேல் சிகிச்சைக்காக ஆசாரிபள்ளம் அரசு மருத்துவக்கல்லூரிக்கு அனுப்பி வைக்கப்பட்டார். அங்கு சிகிச்சை பலனின்றி செபஸ்தியான் பரிதாபமாக இறந்தார். இதுகுறித்த புகாரின் பேரில் திருவட்டார் போலீஸ் சப்-இன்ஸ்பெக்டர் ஞானதாஸ் வழக்குப்பதிவு செய்து விசாரணை நடத்தி வருகிறார்.