பள்ளிக்கூட மாணவியை கடத்தியதாக போக்சோவில் தொழிலாளி கைது

அந்தியூர்:

அம்மாபேட்டை அருகே உள்ள சித்தார் கல்பாவி பகுதியை சேர்ந்தவர் தங்கராஜ். இவருடைய மகன் அண்ணாதுரை (வயது 22). கட்டிட தொழிலாளி. அண்ணாதுரை, அந்தியூர் பகுதியை சேர்ந்த 16 வயது உடைய பிளஸ்-1 மாணவியிடம் பழகி வந்ததாக கூறப்படுகிறது.

இதனால் திருமணம் செய்வதாக ஆசை வார்த்தைக்கூறி அந்த மாணவியை, அண்ணாதுரை கடத்தி சென்றுவிட்டதாக தெரிகிறது. இதுகுறித்து மாணவியின் பெற்றோர் வெள்ளித்திருப்பூர் போலீசில் புகார் அளித்தனர். அதன்பேரில் போலீசார் வழக்குப்பதிவு செய்து விசாரணை நடத்தி மாணவியை கடத்தியதாக அண்ணாதுரையை போக்சோ சட்டத்தின் கீழ் கைது செய்தனர். மேலும் அவரிடம் இருந்து மாணவியையும் மீட்டனர்.