கடினமாக உழைத்து மகிழ்ச்சியாக வாழ வேண்டும்

ரிவேரா கலை விழா

வேலூர் வி.ஐ.டி.யில் ரிவேரா 23 எனும் சர்வதேச கலை கலைவிழா கடந்த 23-ந் தேதி தொடங்கி நேற்று வரை நடைபெற்றது. இதில் நாட்டில் உள்ள 700 பல்கலைக்கழகங்கள், கல்லூரி மற்றும் வெளிநாட்டு பல்கலைக்கழகம், கல்லூரிகளில் இருந்து 45,000-க்கும் மேற்பட்ட மாணவ, மாணவிகள் பங்கேற்றனர். பிரான்ஸ், இத்தாலி, போர்ச்சுக்கல், இலங்கை, எத்தியோப்பியா, வங்காளதேசம், நேபாளம், ஜப்பான், குவைத், நைஜீரியா, அமெரிக்கா, ஐக்கிய அரபு அமீரகம், ஓமன், சவுதி அரேபியா, கம்போடியா, இந்தோனேசியா, தான்சானியா, உகாண்டா, ஜிம்பாப்வே, ருவாண்டா, ஜெர்மனி, சிரியா, மியான்மர், சிங்கப்பூர், இலங்கை உள்ளிட்ட 44 நாடுகளை சார்ந்தவர்களும் பங்கேற்றனர்.

விளையாட்டு போட்டிகள், நாடகம், நாட்டியம், தமிழ், தெலுங்கு மற்றும் இந்தி மொழிகளில் பாட்டுக்கு பாட்டு என 150-க்கும் மேற்ப்பட்ட நிகழ்ச்சிகள் நடைபெற்றன. போட்டியில் வெற்றி பெற்றவர்களுக்கு மொத்தம் ரூ.17 லட்சம் ரொக்கப் பரிசுகள், பதக்கங்கள், சான்றிதழ்கள் மற்றும் கோப்பைகள் வழங்கப்பட்டது.

இதன் நிறைவு விழா நேற்று நடந்தது. பல்வேறு விளையாட்டு போட்டிகளில் ஓட்டு மொத்த சாம்பியன் ஷிப் வேலூர் வி.ஐ.டி.க்கும், கலை மற்றும் கலாசார போட்டிகளில் ஓட்டு மொத்த சாம்பியன் ஷிப் திருச்சி என்.ஐ.டிக்கும் கிடைத்தது.

மகிழ்ச்சியாக வாழ வேண்டும்

ஓட்டு மொத்த சாம்பியன் ஷிப் பட்டம் வென்ற அணிகளுக்கு வி.ஐ.டி. வேந்தர் ஜி.விசுவநாதன் பரிசுகோப்பை வழங்கி பேசினார். அப்போது ரிவேரா விழாவில் பங்குபெற்ற மாணவ, மாணவிகள் அனைவருக்கும், குறிப்பாக வெளிநாட்டு மாணவ, மாணவிகளுக்கு பாராட்டுகளை தெரிவித்தார். வி.ஐ.டி.யில் தற்போது 60 நாடுகளை சேர்ந்த மாணவ, மாணவிகள் கல்வி கற்கின்றனர். எதிர் வரும் காலங்களில் இன்னும் பல்வேறு நாடுகளின் மாணவ- மாணவிகளின் எண்ணிக்கை உயரும் என்றார்.

சிறப்பு விருத்தினராக பிரபல திரைப்பட நடிகை ராஷி கன்னா கலந்துகொண்டு மாணவ, மாணவிகளுடன் கலந்துரையாடி கேள்விகளுக்கு பதில் அளித்தார். பின்னர் பேசிய அவர் கடினமாக உழைக்க வேண்டும். அதே நேரத்தில் வாழ்க்கையை மகிழ்ச்சியாக வாழ வேண்டும் என்றார். மேடையில் பாட்டுப் பாடி மாணவ, மாணவிகளை உற்சாகப்படுத்தினார்.

விழாவில் வி.ஐ.டி. துணைத்தலைவர்கள் சங்கர் விசுவநாதன், ஜி.வி.செல்வம், உதவித்துணை தலைவர் காதம்பரி ச.விசுவநாதன், இணைதுணை வேந்தர் ராம்பாபு கோடாளி மற்றும் பலர் கலந்து கொண்டனர்.