வெண்ணாற்றில் தண்ணீர் திறப்பு அதிகரிக்கப்படுமா?

கூத்தாநல்லூர் பகுதியில் வெண்ணாற்றில் தண்ணீர் திறப்பை அதிகரிக்க வேண்டும் என்று விவசாயிகள் கோரிக்ைக விடுத்துள்ளனர்.

குறுவை சாகுபடி பணிகள்

கூத்தாநல்லூர் மற்றும் வடபாதிமங்கலம் பகுதியில் உள்ள பெரும்பாலான மக்கள் விவசாயத்தையே தங்களது வாழ்வாதாரமாக கொண்டுள்ளனர். ஒவ்வொரு ஆண்டிலும் மேட்டூர் அணையில் இருந்து திறக்கப்படும் தண்ணீரை கொண்டு குறுவை-சம்பா தாளடி நெல் சாகுபடி மற்றும் உளுந்து, பயறு, பருத்தி சாகுபடி பணிகளை செய்து வருகின்றனர். இப்பகுதியில் உள்ள விவசாயிகள் வெண்ணாறு, வெள்ளையாறு, கோரையாறு ஆகிய ஆறுகளில் வரக்கூடிய தண்ணீரையே எதிர்பார்த்து ஒவ்வொரு ஆண்டும் விவசாய பணிகளை செய்து வருகின்றனர்.

நடப்பு ஆண்டின் பாசனத்திற்காக கடந்த 12-ந் தேதி தண்ணீர் திறக்கப்பட்டது. இதையடுத்து கூத்தாநல்லூர் மற்றும் வடபாதிமங்கலம் பகுதிகளில் உள்ள விவசாயிகள் குறுவை சாகுபடி பணிகளை மேற்கொள்ள ஆயத்தமாகி வருகின்றனர்.

குறைவான தண்ணீர்

ஆனாலும் கூத்தாநல்லூர் பகுதியில் உள்ள வெண்ணாற்றில் தண்ணீர் திறக்கப்பட்ட நாளில் இருந்து இதுவரை தண்ணீர் வரத்து குறைவாக உள்ளதாக அந்த பகுதி விவசாயிகள் கூறுகின்றனர். வெண்ணாற்றின் குறுக்கே அமைக்கப்பட்ட தடுப்பணையை கூட தாண்டி செல்ல முடியாத அளவிற்கு மிகவும் குறைவாகவே தண்ணீர் செல்கிறது. காடுவெட்டி, நாகங்குடி, பழையனூர், வடபாதிமங்கலம் பகுதியில் உள்ள தடுப்பணைகளில் இத்தகைய நிலை காணப்படுகிறது. இதனால் பெரும்பாலான பாசன வாய்க்கால்களில் தண்ணீர் செல்லாமல் உள்ளது.

அதிகளவில் தண்ணீர் திறந்துவிட வேண்டும்

கூத்தாநல்லூர் அருகே உள்ள பண்டுதக்குடியில் வெண்ணாற்றில் இருந்து பிரிந்து செல்லக்கூடிய அதிவீரராமன் ஆற்றிலும் தண்ணீர் சென்றடையாமல் உள்ளதாகவும் அந்த பகுதி விவசாயிகள் கூறுகின்றனர். வெண்ணாற்றில் குறைவாக தண்ணீர் வருவதால் பாசன வாய்க்கால்கள் மூலம் தண்ணீர் கொண்டு செல்வதில் தாமதம் ஏற்படும் வாய்ப்பு உள்ளது. எனவே சம்பந்தப்பட்ட அதிகாரிகள் வெண்ணாற்றில் அதிகளவில் தண்ணீர் திறந்து விட வேண்டும் என்று அந்த பகுதி விவசாயிகள் எதிர்பார்க்கின்றனர்.