கூரை வீட்டுக்கு தீவைத்த வாலிபர் கைது

கடலூர் முதுநகர்

கடலூர் முதுநகர் அருகே உள்ள அங்காளம்மன் காரைக்காடு பகுதியை சேர்ந்தவர் கதிர்வேல் மகன் ஜெயக்குமார்(வயது 45). ஆட்டோ டிரைவரான இவருக்கும் அதே பகுதியை சேர்ந்த காளியப்பன் மகன் மணிகண்டன்(36) என்பவருக்கும் முன்விரோதம் இருந்து வந்ததாக தெரிகிறது. இதனால் சம்பவத்தன்று ஜெயக்குமாரை மிரட்டி, அவரது கூரை வீட்டுக்கு மணிகண்டன் தீ வைத்ததாக கூறப்படுகிறது. இதில் வீட்டின் ஒரு பகுதி தீயில் கருகி சேதம் அடைந்தது. இது குறித்த புகாரின் பேரில், கடலூர் முதுநகர் போலீசார் வழக்கு பதிவு செய்து மணிகண்டனை கைது செய்து விசாரணை நடத்தி வருகின்றனர்.