மோட்டார் சைக்கிளில் இருந்து தவறி விழுந்தவர் பலி

போடி பெரியாண்டவர் நெடுஞ்சாலை பொன்னம்பலம் தெருவை சேர்ந்தவர் மணிகண்டன் (வயது 50). இவர் கிரில் பட்டறை வைத்து உள்ளார். இவர் நேற்று காலை போடி அருகே உள்ள வடமலை நாச்சியப்பன் மலைக்கோவிலுக்கு கிடா வெட்டுக்கு சென்று விட்டு நடந்து வந்து கொண்டிருந்தார். அப்போது அந்த வழியாக போடி புதூர் வலசைத்துறை ரோட்டை சேர்ந்த முருகன் (51) என்பவர் ஓட்டி வந்த மோட்டார் சைக்கிளில் 'லிப்ட்' கேட்டு ஏறினார். பாலாற்று ஓடை அருகே வந்தபோது அவர், மயக்கம் வருவதாக கூறி மோட்டார் சைக்கிளில் இருந்து தவறி கீழே விழுந்தார். இதில் படுகாயம் அடைந்த அவரை அக்கம்பக்கத்தினர் மீட்டு சிகிச்சைக்காக போடி அரசு ஆஸ்பத்திரியில் சேர்த்தனர். அங்கு பரிசோதித்த டாக்டர்கள், மணிகண்டன் ஏற்கனவே இறந்து விட்டதாக கூறினர். இதுகுறித்து குரங்கணி போலீசார் வழக்குப்பதிவு செய்து விசாரணை நடத்தி வருகின்றனர்.