வியாபாரி வீட்டில் 5 பவுன் நகை திருட்டு

சின்னமனூர் அருகே உள்ள சீலையம்பட்டி மேற்கு தெருவை சேர்ந்தவர் தினேஷ் பாண்டியன் (வயது 33). இவர், அதே பகுதியில் பலசரக்கு கடை வைத்துள்ளார். கடந்த 2-ந்தேதி இவர், குடும்பத்துடன் தஞ்சாவூரில் நடந்த தனது உறவினர் வீட்டு விசேஷத்திற்கு சென்று விட்டார். நேற்று முன்தினம் இரவு அவர் வீட்டிற்கு வந்தார். அப்போது வீட்டின் கதவில் இருந்த பூட்டு உடைக்கப்பட்டு திறந்து கிடந்தது. இதனால் அதிர்ச்சி அடைந்த அவர் உள்ளே சென்று பார்த்தார்.

அப்போது பீரோ உடைக்கப்பட்டு அதில் இருந்த 5 பவுன் நகை, வெள்ளி பொருட்கள் மற்றும் வீட்டில் இருந்த மடிக்கணினி திருடுபோய் இருந்தது. இதுகுறித்து அவர் சின்னமனூர் போலீசுக்கு தகவல் கொடுத்தார். அதன்பேரில் போலீசார் சம்பவ இடத்திற்கு விரைந்தனர். பின்னர் திருட்டு நடந்த வீட்டை பார்வையிட்டு விசாரணை நடத்தினர். இதுகுறித்து தினேஷ் பாண்டியன் போலீசில் புகார் கொடுத்தார். அதன்பேரில் போலீசார் வழக்குப்பதிவு செய்து திருடிய மர்ம நபர்களை தேடி வருகின்றனர்.