புனித உபகார அன்னை ஆலய திருவிழா கொடியேற்றத்துடன் தொடங்கியது

பணகுடி:

காவல்கிணறு புனித உபகார அன்னை ஆலய திருவிழா ஆண்டுதோறும் சிறப்பாக கொண்டாடப்பட்டு வருகிறது. இந்த ஆண்டு திருவிழா நேற்று முன்தினம் மாலை கொடியேற்றத்துடன் தொடங்கியது. வேளாங்கண்ணி திருத்தல அதிபர் இருதயராஜ் கொடியேற்றினார்.

திருவிழா நாட்களில் தினமும் காலை திருயாத்திரை, திருப்பலியும், மாலையில் ஜெபமாலை, மறையுரை, நற்கருணை ஆசீரும் நடைபெறுகிறது. 8-ம் திருநாளான வருகிற 22-ந் தேதி அன்று காலை புதுநன்மை திருப்பலி, தக்கலை மறை மாவட்டஆயர் ஜார்ஜ் ராஜேந்திரன் தலைமையில் நடைபெறுகிறது. மாலை 6.30 மணிக்கு ஜெபமாலை மற்றும் நற்கருணை பவனி மறைவட்ட முதன்மை குரு ஜான் பிரிட்டோ தலைமையில்நடைபெறுகிறது. தென்மண்டல பள்ளிகளின் கண்காணிப்பாளர் அருட்தந்தை ஸ்டாலின் மறையுரையாற்றுகிறார்.

9-ம் திருவிழாவான வருகிற 23-ந் தேதி அன்று மாலையில் பெருவிழா மாலை ஆராதனை தூத்துக்குடி மறைமாவட்ட பிஷப் ஸ்டீபன் தலைமையில் நடைபெறுகிறது. இரவில் அன்னையின் தேர் பவனி நடைபெறுகிறது. மறுநாள் 10-ம் திருவிழா அன்று காலை பெருவிழா ஆடம்பர கூட்டுத்திருப்பலி தூத்துக்குடி மறைமாவட்ட பிஷப் ஸ்டீபன் தலைமையில் நடக்கிறது. அதன் பின் உறுதிபூசுதல் வழங்கப்படுகிறது. ஏற்பாடுகளை பங்குத்தந்தை ஆரோக்கியராஜ், உதவி பங்குத்தந்தை வினோத், அருட் சகோதரிகள் மற்றும் பங்கு மேய்ப்பு குழுவினர் மற்றும் இறைமக்கள் செய்து வருகின்றனர்.