சமூக நீதி, சமத்துவம் என்பதே திராவிட மாடல்

திராவிடர் கழகம் சார்பில் திருவாரூரில், சனாதன எதிர்ப்பு மற்றும் திராவிட மாடல் ஆட்சி விளக்க மாநாடு நடந்தது. மாநாட்டிற்கு திராவிடர் கழக தலைவர் கி.வீரமணி தலைமை தாங்கி பேசினார்.

அவர் பேசியதாவது:-

சனாதனம் என்பது ஆரிய மாடல். சனாதனம் என்பது இன்னாருக்கு இதுதான் என்கிற மனு தர்மம். திராவிட மாடல் என்பது எல்லோருக்கும் எல்லாம் என்கிற சமத்துவம். சமூக நீதி, பொருளாதார நீதி, அரசியல் நீதி என்ற அம்பேத்கர் கொண்டு வந்த அரசியல் சட்ட அமைப்பினை மாற்ற முயல்வது தான் சனாதனமாகும். பெரியார் பிறந்த நாளை சமூக நீதி நாள், அம்பேத்கர் பிறந்த நாளை சமத்துவ நாள் என தி.மு.க. அரசு அறிவித்தது.

திராவிட மாடல்

சமூக நீதி, சமத்துவம் என்பதே திராவிட மாடல். இந்த தத்துவத்தை பாதுகாப்பது இந்திய அரசியல் அமைப்பு சட்டம். அதனால் சனாதனத்திற்கு எதிரி இந்திய அரசியல் சட்டம் தான். சனாதன எதிர்ப்பு என்பது மனிதநேய ஆதரவு, வளர்ச்சி என்ற அர்த்தமாகும்.

திராவிட, சுயமரியாதை, பகுத்தறிவு தத்துவங்கள் முழுக்க சமூக விஞ்ஞான தத்துவங்களாகும். திருவாரூரில், ஒடாத ஆழித்தேரை ஒட்டியவர் கருணாநிதி. எனவே திருவாரூர் தெற்கு வீதிக்கு கலைஞர் வீதி என பெயர் சூட்ட வேண்டும்.

இவ்வாறு அவர் பேசினார்.

சாதிக்கும் ஆற்றல்

விடுதலை சிறுத்தைகள் கட்சி தலைவர் தொல்.திருமாளவன் பேசும்போது, தமிழகத்தையும், கேரளாவையும் குறி வைக்கும் சனாதன சக்திகள் விரட்டி அடிக்கப்பட வேண்டும். எதையும் சாதிக்கும் ஆற்றல் திராவிடர் கழகத்திற்கும், தி.மு.கவிற்கும் உண்டு. தமிழகத்தின் வளர்ச்சிக்கும், மாற்றத்திற்கும் கருணாநிதி தான் காரணம். தனது 13 வயதில் இந்தியை எதிர்த்து குரல் கொடுத்து போராடிய வீதி திருவாரூர் தெற்கு வீதி, அந்த வீதிக்கு முத்தமிழ் அறிஞர் கலைஞர் வீதி என பெயர் சூட்ட வேண்டும் என்றார்.

இந்திய கம்யூனிஸ்டு கட்சி மாநில செயலாளர் முத்தரசன் பேசும்போது, சுயமாக சிந்திப்பதற்கும், பேசுவதற்கும், எழுதுவதற்கும் வாய்ப்பு உரிமைகளை வழங்கிய அம்பேத்கர் கொண்டு வந்த அரசியல் சட்டம் பாதுகாக்கப்பட வேண்டும் என தொடர்ந்து போராடி வருகிறோம். இந்த அரசியல் அமைப்பு சட்டத்தை மாற்ற முயற்சிக்கும், வேறு ஒரு அரசியல் சட்டம் தான் மனு தர்மமாகும். தேசிய கல்வி கொள்கை, நீட் நுழைவு தேர்வு மூலம் மனு தர்மத்தை பா.ஜனதா பின்பற்றி வருகிறது என்றார்.

மார்க்சிஸ்ட் கம்யூனிஸ்டு கட்சி மாநில செயலாளர் பாலகிருஷ்ணன் பேசும்போது, தமிழகத்தில் எந்த காலத்திலும் பா.ஜனதா கட்சி கால் ஊன்ற முடியாது. மதசார்பின்மையற்ற நாட்டில் பிரதமர் மோடி, ஆர்.எஸ்.எஸ் தலைவருடன் ராமர் கோவில் அடிக்கல் நாட்டு விழாவில் பங்கேற்பது ஏற்புடையதல்ல. அரசியல் சாசனத்திற்கு எதிரானது. இந்தியாவை பாதுகாக்கப்பட வேண்டும் என்பதற்காக சனாதனத்தை எதிர்க்கிறோம் என்றார்.

சமூக நீதிக்கு எதிரானது

தி.மு.க. அமைப்பு செயலாளர் ஆர்.எஸ். பாரதி பேசும்போது, தி.மு.க.வை எதிர்த்தவர்கள் காணாமல் போய் உள்ளனர் என்பது வரலாறு. பெரியார், அண்ணா, கருணாநிதி உலவிய மண்ணில் உங்கள் சாயம் எடுபடாது. நமது உரிமைகள் பறிபோகும் நிலை உருவாகியுள்ளது. இன்றைய இளைஞர்கள் இதனை உணர வேண்டும். திராவிட மாடலின்படி தான் அனைவரும் கல்வி கற்று பல்வேறு பதவிக்கு செல்ல முடிந்தது என்பதை உணர வேண்டும். சமூக நீதிக்கு எதிரான சனாதனத்தை எதிர்ப்போம் என்றார்.

கூட்டத்தில் திருவாரூர் மாவட்ட தி.மு.க. செயலாளர் பூண்டி கலைவாணன், ம.தி.மு.க. அரசியல் ஆய்வுமைய செயலாளர் செந்திலதிபன், முன்னாள் அமைச்சர் மதிவாணன், நாகை மாவட்ட தி.மு.க. செயலாளர் கவுதமன், காங்கிரஸ் கட்சி மாவட்ட தலைவர் துரைவேலன், திராவிடர் கழக பொதுச் செயலாளர் ஜெயக்குமார், திருவாரூர் நகர செயலாளர் பிரகாஷ் உள்பட பலர் கலந்து கொண்டனர். முன்னதாக திராவிடர் கழக மாவட்ட தலைவர் மோகன் வரவேற்றார். முடிவில் செயலாளர் கோவிந்தராஜ் நன்றி கூறினார்.