தக்கலை இ.எஸ்.ஐ. ஆஸ்பத்திரி ஊழியருக்கு 2 ஆண்டு சிறை

நாகர்கோவில்:

வருமானத்துக்கு அதிகமாக சொத்து சேர்த்த வழக்கில் தக்கலை இ.எஸ்.ஐ. அரசு ஆஸ்பத்திரி ஊழியருக்கு 2 ஆண்டு சிறை தண்டனை விதித்து நாகர்கோவில் கோர்ட்டு தீர்ப்பு கூறியது.

இ.எஸ்.ஐ. ஆஸ்பத்திரி ஊழியர்

தக்கலை இ.எஸ்.ஐ. அரசு ஆஸ்பத்திரியில் மருந்தாளுனராக ராஜகுமார் (வயது 55) என்பவர் பணியாற்றி வருகிறார். இவர் 14-5-1994 முதல் 31-5-1998 வரை வருமானத்துக்கு அதிகமாக ரூ.5 லட்சத்து 80 ஆயிரத்து 631-க்கு சொத்து சேர்த்துள்ளார் என்ற குற்றச்சாட்டு எழுந்தது. இதுகுறித்து குமரி மாவட்ட லஞ்ச ஒழிப்பு போலீசார் வழக்குப்பதிவு செய்து புலன்விசாரணை மேற்கொண்டனர்.

அதைத்தொடர்ந்து லஞ்ச ஒழிப்பு போலீசார் இந்த வழக்கில் கடந்த 3-3-2009 அன்று நாகர்கோவிலில் உள்ள மாவட்ட தலைமை குற்றவியல் கோர்ட்டில் குற்றப்பத்திரிக்கை தாக்கல் செய்தனர். வழக்கை தலைமை குற்றவியல் நீதிபதி ஆர்.கோகுலகிருஷ்ணன் விசாரித்து வந்தார்.

2 ஆண்டு சிறை

நேற்று இந்த வழக்கில் தீர்ப்பு கூறப்பட்டது. அப்போது குற்றம் சாட்டப்பட்ட ராஜகுமாருக்கு 2 ஆண்டு சிறைத்தண்டைனையும், ரூ.5 ஆயிரம் அபராதமும் விதித்து நீதிபதி கோகுலகிருஷ்ணன் உத்தரவு பிறப்பித்தார். மேலும் வருமானத்திற்கு அதிகமாக சேர்த்த சொத்தை பொது ஏலத்தின் மூலம் அரசுடைமையாக்க நீதிபதி ஆணை பிறப்பித்தார்.

இந்த வழக்கில் அரசுதரப்பில் அரசு வக்கீல் ஜென்ஸி ஆஜராகி வாதாடினார்.