அரசு பள்ளி ஊழியரை தாக்கியதலைமை ஆசிரியர் பணி இடைநீக்கம்

ஓசூர்:

ஓசூர் தாலுகா, பாகலூர் அருகே தேவீரப்பள்ளி கிராமத்தில் உள்ள அரசு உயர்நிலைப்பள்ளியில் இளநிலை உதவியாளராக இருந்து வருபவர் பொன்னம்பலம். கடந்த 22-ந் தேதி, அலுவலக பணி சம்பந்தமாக பள்ளியின் தலைமை ஆசிரியர் அன்னையப்பா என்பவர், பொன்னம்பலத்திடம் தகராறு செய்து உள்ளார். அப்போது அவரை தலைமை ஆசிரியர் தகாத வார்த்தைகளால் திட்டியும், தாக்கியும் காயப்படுத்தியதாக கூறப்படுகிறது. இந்த சம்பவம் குறித்து பொன்னம்பலம், மாவட்ட முதன்மை கல்வி அலுவலர் மகேஸ்வரிக்கு புகார் அனுப்பினார். இதையடுத்து அவரது உத்தரவின்பேரில், மாவட்ட முதன்மை கல்வி அலுவலரின் நேர்முக உதவியாளர் பிரபாகரன், மாவட்ட கல்வித்துறை துணை கண்காணிப்பாளர் பிரபாவதி ஆகியோர் பள்ளிக்கு சென்று நேரில் விசாரணை நடத்தினார்கள். விசாரணைக்கு பின்னர், தலைமைஆசிரியர் அன்னையப்பாவை, நேற்று முன்தினம் பணி இடைநீக்கம் (சஸ்பெண்டு) செய்து மாவட்ட முதன்மை கல்வி அலுவலர் மகேஸ்வரி உத்தரவிட்டார்.