கோடை கால விளையாட்டு பயிற்சி முகாம்

தாமரைக்குளம்:

தமிழ்நாடு விளையாட்டு மேம்பாட்டு ஆணையத்தின் சார்பில் பள்ளி மாணவ, மாணவிகளுக்கு மாவட்ட அளவிலான கோடை கால இலவச விளையாட்டு பயிற்சி முகாம், அரியலூர் மாவட்ட விளையாட்டு அரங்கில் நடைபெற்று வருகிறது. தினமும் காலை, மாலை என இருவேளைகளில் கைப்பந்து, கால்பந்து, ஆக்கி, கூடைப்பந்து உள்ளிட்ட பல்வேறு விளையாட்டுகளுக்கு மாவட்ட விளையாட்டு அலுவலர் லெனின் வழிகாட்டுதலின்படி பயிற்சியாளர்கள் பயிற்சி அளித்து வருகின்றனர். இதில் 200-க்கும் மேற்பட்ட பள்ளி மாணவ, மாணவிகள் மிகுந்த ஆர்வத்துடன் பங்கேற்று பயிற்சி பெற்று வருகின்றனர். பயிற்சியின் முடிவில் இதில் பங்கேற்ற அனைவருக்கும் சான்றிதழ் வழங்கப்பட உள்ளது. பயிற்சி பெறும் மாணவ, மாணவிகளுக்கு தமிழ்நாடு விளையாட்டு மேம்பாட்டு ஆணையம் நடத்தும் விளையாட்டு விடுதியில் சேருவதற்கான ஆலோசனைகள் வழங்கப்படுகின்றன.