தஞ்சையில் ஆசிரியர்களை மலர்தூவி வரவேற்ற மாணவர்கள்

ஆசிரியர் தினத்தையொட்டி தஞ்சையில் ஆசிரியர்களை மாணவ, மாணவிகள் மலர்கள் தூவி வரவேற்றனர்.மேலும் ரோஜாப்பூ, பேனா போன்றவற்றையும் வழங்கி தங்கள் மகிழ்ச்சியை வெளிப்படுத்தினர்.

ஆசிரியர் தினம்

ஒவ்வொரு ஆண்டும், டாக்டர் ராதாகிருஷ்ணனின் பிறந்த நாளான செப்டம்பர் மாதம் 5-ந்தேதி அவருடைய பங்களிப்புகள் மற்றும் சாதனைகளுக்கு நினைவு கூரும் வகையில், தேசிய ஆசிரியர் தினமாக கொண்டாடப்பட்டு வருகிறது. இதையொட்டி ஒவ்வொருவரும் தங்களுக்கு பயிற்றுவித்த ஆசிரியர்களுக்கு வாழ்த்துக்களை தெரிவிப்பதோடு, நினைவு பரிசும் வழங்குவது வழக்கம்.

தஞ்சையில் உள்ள ஒரு பள்ளியில் தங்கள் பயிற்றுவிக்கும் ஆசிரியர், ஆசிரியைகளை மலர்தூவி வரவேற்றதோடு, பேனா, ரோஜாப்பூ உள்ளிட்டவற்றையும் வழங்கினர். இது பற்றியவிவரம் வருமாறு:-

ரோஜாப்பூக்களை தூவினர்

தஞ்சை தென்கீழ் அலங்கம் பகுதியில் மாநகராட்சி மேல்நிலைப்பள்ளி உள்ளது. இங்கு 350-க்கும் மேற்பட்ட மாணவ, மாணவிகள் படித்து வருகிறார்கள். இங்கு பள்ளி தலைமை ஆசிரியர் வடிவேல் உள்பட 17 ஆசிரிய, ஆசிரியைகள் பணியாற்றி வருகிறார்கள். இந்த பள்ளிக்கு வழக்கம் போல நேற்று ஆசிரியர்கள் வருகை புரிந்தனர்.

அப்போது மாணவர்கள் தங்களுக்கு பயிற்றுவிக்கும் ஆசிரிய, ஆசிரியைகளுக்கு ஆசிரியர் தினத்தையொட்டி நன்றி தெரிவிக்கும் வகையில் ரோஜாப்பூக்களை தூவி வரவேற்றனர். பின்னர் ஆசிரியர்களுக்கு நெற்றில் திலகமிட்டு வரவேற்றதுடன் ரோஜாப்பூக்களையும் வழங்கி மகிழ்ச்சியை பரிமாறிக்கொண்டனர். மேலும் ஆசிரியர்களுக்கு நினைவு பரிசாக பேனாக்களையும் வழங்கினர்.

இதே போன்று பல்வேறு பள்ளிகளிலும் நடைபெற்ற ஆசிரியர் தின விழாவில் மாணவ, மாணவிகள் தங்கள் பயிற்றுவிக்கும், பயிற்றுவித்த ஆசிரியர்களுக்கும் நினைவு பரிசுகளை வழங்கி வாழ்த்துக்களை தெரிவித்தனர்.