பஸ் படிக்கட்டில் தொங்கியபடி மாணவர்கள் பயணம்:டிரைவர்- கண்டக்டருக்கு எம்.எல்.ஏ. எச்சரிக்கை

திருப்பூரில் இருந்து ஈரோடு நோக்கி தனியார் பஸ் ஒன்று சென்று கொண்டிருந்தது. விஜயமங்கலத்தில் இருந்து பெருந்துறை நோக்கி சென்றபோது பஸ்சின் பின்புறமாக பெருந்துறை ஜெயக்குமார் எம்.எல்.ஏ. தனது காரில் வந்து கொண்டிருந்தார். அப்போது அந்த தனியார் பஸ்சின் பின்புற படிக்கட்டுகளில் கல்லூரி மாணவர்கள் சிலர் நின்றுகொண்டு தொங்கியபடி, ஆபத்தான முறையில் பயணித்ததை கண்டார். இதை கண்டதும் அதிர்ச்சி அடைந்த ஜெயக்குமார் எம்.எல்.ஏ. அந்த பஸ்சை விஜயமங்கலம் சுங்கச்சாவடி அருகே தடுத்து நிறுத்தினார்.

இதைத்தொடர்ந்து அந்த பஸ்சின் டிரைவர் மற்றும் கண்டக்டரை அழைத்து அவர் கூறுகையில், 'படிக்கட்டுகளில் நின்று தொங்கியபடி பயணம் செய்யும் மாணவர்களை, ஏன் பஸ்சில் ஏற அனுமதித்தீர்கள்? திருப்பங்களில், பஸ்சில் தொங்கி கொண்டு வரும் மாணவர்களின் கால்கள், ரோட்டில் உரசியபடி வருவது, உங்களுக்கு தெரியுமா? பொறுப்பற்ற முறையில், நீங்கள் தொடர்ந்து மாணவர்களை பஸ்சில் பயணம் செய்ய அனுமதித்தால், உங்கள் மீது நடவடிக்கை எடுக்கக்கோரி, பெருந்துறை வட்டாரப் போக்குவரத்து அலுவலரிடம் பரிந்துரை செய்வேன்,' என எச்சரிக்கை விடுத்தார். இதையடுத்து, பஸ் படிக்கட்டுகளில் தொங்கியபடி பயணம் செய்த கல்லூரி மாணவர்கள் அனைவரும், பஸ்சின் உட்புறத்திற்கு சென்றனர். பின்னர் அந்த பஸ் ஈரோட்டை நோக்கி புறப்பட்டு சென்றது. இந்த சம்பவத்தால், விஜயமங்கலம் சுங்கச்சாவடி அருகே சிறிது நேரம் பரபரப்பு ஏற்பட்டது.