சிறந்த சமூக சேவைக்கான மாநில இளைஞர் விருது

கூடலூர், 

நாட்டின் 75-வது சுதந்திர தின அமுதப் பெருவிழா நாடு முழுவதும் இன்று (திங்கட்கிழமை) கொண்டாடப்படுகிறது. இதையொட்டி தமிழக அரசின் சார்பில் முதல்-அமைச்சர் மு.க.ஸ்டாலின் சென்னையில் தேசியக்கொடியை ஏற்றி மரியாதை செலுத்துகிறார். தொடர்ந்து பல்வேறு துறைகளில் சாதனை புரிந்தவர்களுக்கு விருதுகள் வழங்கி கவுரவிக்கிறார். இதில் சிறந்த சமூக சேவை செய்ததற்காக நீலகிரி மாவட்டம் கூடலூர் நகராட்சிக்கு உட்பட்ட மேல் கூடலூர் ஜீவ சாந்தி அறக்கட்டளையை சேர்ந்த முகமது ஆசிக் என்பவர் தேர்வு செய்யப்பட்டு உள்ளார். அவருக்கு சிறந்த சமூக சேவைக்கான மாநில இளைஞர் விருதை சென்னையில் நடைபெறும் சுதந்திர தின விழாவில் முதல்-அமைச்சர் மு.க.ஸ்டாலின் வழங்குகிறார். இதுகுறித்து அதிகாரிகள் கூறும்போது, நீலகிரி மாவட்டத்திலேயே சமூக சேவைக்கான மாநில இளைஞர் விருதை முகமது ஆசிக் பெற உள்ளார் என்றனர். தொடர்ந்து அவரை பாராட்டி சென்னைக்கு அனுப்பி வைத்தனர்.