குரு பெயர்ச்சியையொட்டிகோவில்களில் சிறப்பு வழிபாடு

குரு பெயர்ச்சி விழா

குரு பகவான் மீன ராசியில் இருந்து மேஷ ராசிக்கு பெயர்ச்சி அடைந்தார். இதையொட்டி தர்மபுரி பகுதியில் உள்ள அனைத்து கோவில்களிலும் குரு பெயர்ச்சி விழா சிறப்பாக நடைபெற்றது. விடிய விடிய நடந்த இந்த சிறப்பு வழிபாட்டில் அந்தந்த பகுதியைச் சேர்ந்த ஏராளமான பக்தர்கள் கலந்து கொண்டு சாமி தரிசனம் செய்தனர். இந்த குரு பெயர்ச்சியால் நன்மை பெறும் மேஷம், மிதுனம், தனுசு, சிம்மம், துலாம் ஆகிய ராசிக்காரர்கள் கலந்து கொண்டு நிவர்த்தி வழிபாடு செய்து கொண்டனர். இதேபோல் கடகம், விருச்சிகம், கன்னி, மகரம், ரிஷபம், மீனம் ஆகிய ராசிக்காரர்கள் பரிகார பூஜை செய்து கொண்டனர்.

தர்மபுரி குமாரசாமிப்பேட்டை சிவசுப்பிரமணியசாமி கோவில் வளாகத்தில் உள்ள ஸ்ரீ வினாதார தட்சிணாமூர்த்தி சன்னதியில் குரு பெயர்ச்சி விழா சிறப்பாக நடைபெற்றது. விழாவையொட்டி கணபதி ஹோமம், நட்சத்திரம் மற்றும் ராசிக்கான ஹோமம் நடைபெற்றது. பின்னர் சாமிக்கு சிறப்பு அபிஷேக ஆராதனை மற்றும் வழிபாடுகள் நடைபெற்றது. தொடர்ந்து குரு பெயர்ச்சி சிறப்பு பூஜையும், மகா தீபாராதனையும் நடைபெற்றது. இதில் ஏராளமான பக்தர்கள் கலந்து கொண்டு சாமி தரிசனம் செய்தனர். விழாவையொட்டி பக்தர்களுக்கு பிரசாதம் வழங்கப்பட்டது.

மகாலிங்கேஸ்வரர் கோவில்

தர்மபுரி கோட்டை மல்லிகார்ஜூன சாமி கோவிலில் குரு பெயர்ச்சி விழா நடைபெற்றது. விழாவில் குருபகவானுக்கு சிறப்பு அபிஷேக ஆராதனை மற்றும் வழிபாடுகள் நடைபெற்றது. இதில் ஏராளமான பக்தர்கள் கலந்து கொண்டு பரிகார பூஜைகள் செய்து கொண்டனர். இதேபோல் தர்மபுரி நெசவாளர் நகர் மங்களாம்பிகை உடனாகிய மகாலிங்கேஸ்வரர் கோவிலில் நடைபெற்ற குரு பெயர்ச்சி விழாவில் ஏராளமான பக்தர்கள் கலந்து கொண்டு சாமி தரிசனம் செய்தனர். விழாவையொட்டி தட்சிணாமூர்த்திக்கு சிறப்பு அபிஷேக ஆராதனைகள் நடைபெற்றது.

தர்மபுரி கடைவீதி அம்பிகா பரமேஸ்வரி அம்மன் உடனாகிய மருதவானேஸ்வரர் கோவிலில் நடைபெற்ற குரு பெயர்ச்சி விழாவில் ஏராளமான பக்தர்கள் கலந்து கொண்டு சாமி தரிசனம் செய்தனர். இதேபோல் அன்னசாகரம் சிவசுப்பிரமணியசாமி கோவில் உள்ளிட்ட நகரில் உள்ள அனைத்து கோவில்களிலும் குரு பெயர்ச்சி விழாவையொட்டி தட்சிணாமூர்த்திக்கு சிறப்பு வழிபாடுகள் நடைபெற்றது.