கோத்தகிரி அம்மன் கோவில்களில் சிறப்பு பூஜை

கோத்தகிரி

ஆடிமாத அமாவாசை, பவுர்ணமி, கிருத்திகை மற்றும் வெள்ளிக்கிழமை ஆகிய நாட்கள் அம்மனுக்கு வழிபாடு செய்ய உகந்த நாட்களாக கருதப்படுகிறது. இதையொட்டி ஒவ்வொரு ஆண்டும் ஆடி மாத வெள்ளிக்கிழமைகள், அமாவாசை தினங்களில் அம்மனுக்கு சிறப்பு பூஜைகள் நடத்தப்படுவதுடன், மகளிர் பங்கேற்கும் 108 விளக்கு பூஜையும் நடைபெற்று வருகிறது. இந்த நிலையில் ஆடி மாத அமாவாசை நாளான நேற்று காலை கோத்தகிரி கடைவீதியில் அமைந்துள்ள பண்ணாரி மாரியம்மன் கோவிலில் அம்மனுக்கு அபிஷேக அலங்கார பூஜைகள் மற்றும் ஊஞ்சல் வழிபாடு ஆகியவை நடைபெற்றன.

இதேபோல கோத்தகிரி கடைவீதியில் உள்ள பிரசித்தி பெற்ற மாரியம்மன் கோவில் மற்றும் டானிங்டன் கருமாரியம்மன் கோவிலிலும் ஊஞ்சல் வழிபாடு மற்றும் சிறப்பு பூஜைகள் நடத்தப்பட்டன. இதில் ஏராளமான பக்தர்கள் கலந்துக்கொண்டு அம்மனை வழிபட்டனர். தொடர்ந்து பக்தர்களுக்கு பிரசாதம் வழங்கப்பட்டது. இந்த கோவில்களில் வருகிற 3-ந் தேதி ஆடிபெருக்கு பூஜையும், 5-ந் தேதி வரலட்சுமி விரதம் மற்றும் 108 திருவிளக்கு பூஜையும், 15-ந் தேதி மஹா சங்கடஹர சதுர்த்தி பூஜையும் நடைபெறுகிறது. மேலும் ஆடி மாத அனைத்து வெள்ளிக்கிழமைகளிலும் சிறப்பு பூஜைகள் நடைபெறுகின்றன.