பொங்கல் பண்டிகைக்காக சிறப்பு பஸ்கள்

பொங்கல் பண்டிகைக்காக சிறப்பு பஸ்கள் இயக்கப்பட உள்ளது என்றுதமிழ்நாடு அரசு போக்குவரத்து கழக மண்டல மேலாண் இயக்குனர் ராஜ்மோகன் கூறியுள்ளார்.

இதுகுறித்து அவர் வெளியிட்டுள்ள செய்தி குறிப்பில் கூறியிருப்பதாவது:-

பொங்கல் பண்டிகை

பொங்கல் பண்டிகையை முன்னிட்டு பொதுமக்கள் எளிதாக எவ்வித சிரமம் இன்றி பயணம் செய்ய ஏதுவாக சிறப்பு பஸ்கள் இயக்கப்பட உள்ளன.

அதன்படி சென்னையில் இருந்து கும்பகோணம், தஞ்சாவூர், பட்டுக்கோட்டை, பேராவூரணி, மன்னார்குடி, நன்னிலம், நாகை, காரைக்கால், வேளாங்கண்ணி, மயிலாடுதுறை, திருவாரூர், திருத்துறைப்பூண்டி, வேதாரண்யம், திருச்சி, அரியலூர், ஜெயங்கொண்டம், கரூர், புதுக்கோட்டை, காரைக்குடி, ராமநாதபுரம், மதுரை உள்ளிட்ட பகுதிகளுக்கு நாளை(வியாழக்கிழமை), 13,14-ந்தேதிகளில் சிறப்பு பஸ்கள் இயக்கப்பட உள்ளன.

சிறப்பு பஸ்கள்

அதேபோல திருச்சியில் இருந்து தஞ்சாவூர், கும்பகோணம், திருவாரூர், நாகை, புதுக்கோட்டை, மதுரை ஆகிய இடங்களுக்கும், மதுரை, கோயம்புத்தூர், திருப்பூர் ஆகிய இடங்களில் இருந்து திருச்சி, தஞ்சாவூர், புதுக்கோட்டை ஆகிய இடங்களுக்கும் மற்றும் கும்பகோணம் போக்குவரத்து கழக இயக்க பகுதிக்குட்பட்ட அனைத்து முக்கிய நகரங்களுக்கும் சிறப்பு பஸ்கள் இயக்கப்பட உள்ளன.

இதற்காக சென்னையில் இருந்து மற்ற ஊர்களுக்கு செல்லும் பொதுமக்கள் எளிதாக பயணம் செய்யும் வகையில், தற்காலிக பஸ் நிலையங்கள் அமைக்கப்பட்டுள்ளன. கும்பகோணம், தஞ்சாவூர், பட்டுக்கோட்டை, பேராவூரணி, மன்னார்குடி, நன்னிலம், திருவையாறு, ஒரத்தநாடு மார்க்கமாக இயக்கப்படும் பஸ்கள், தாம்பரம் சானிடோரியம் அறிஞர் அண்ணா பஸ் நிறுத்தத்தில் இருந்து இயக்கப்படும்.

மீண்டும் திரும்பி ஊருக்கு செல்ல ஏற்பாடு

அதேபோல செந்துறை, ஜெயங்கொண்டம், புதுக்கோட்டை அறந்தாங்கி, ராமநாதபுரம், ராமேஸ்வரம், பரமக்குடி, மதுரை, கமுதி, முதுகுளத்தூர், நாகை, வேளாங்கண்ணி, மயிலாடுதுறை, சீர்காழி, திருவாரூர், திருத்துறைப்பூண்டி, வேதாரண்யம் மார்க்கமாக செல்லும் பஸ்கள் கோயம்பேடு பஸ் நிலையத்தில் இருந்து இயக்கப்பட உள்ளது.

மேலும் பொங்கல் முடிந்து மீண்டும் அவரவர் ஊர்களுக்கு செல்ல 16, 17, 18 ஆகிய தேதிகளில் சிறப்பு பஸ்கள் இயக்க ஏற்பாடு செய்யப்பட்டுள்ளன. இவ்வாறு அதில் கூறப்பட்டுள்ளது.