ஒரு கிலோ ரூ.100-க்கு விற்பனை-கோவையில் சின்ன வெங்காயம் விலை கிடு கிடு உயர்வு

கோவையில் மழை காரணமாக சின்ன வெங்காயம் விலை கிடு, கிடு வென உயர்ந்து உள்ளது. ஒரு கிலோ சின்ன வெங்காயம் ரூ.100-க்கு விற்பனை செய்யப்படுகிறது.

சின்ன வெங்காயம் சாகுபடி

சைவம் மற்றும் அசைவம் சமைப்பதற்கு சின்ன வெங்காயத்தின் தேவை அதிகளவு உள்ளது. கோவை மாவட்டத்தில் தொண்டாமுத்தூர், பேரூர், பொள்ளாச்சி, நரசீபுரம், கிணத்துக்கடவு உள்ளிட்ட பல்வேறு இடங்களில் சின்ன வெங்காயம் அதிகமாக சாகுபடி செய்யப்படுகிறது. இதற்கு அடுத்தப்படியாக பெரிய வெங்காயம் மற்றும் தக்காளி உள்ளிட்டவையும் விளைவிக்கப்படுகின்றன. சின்ன வெங்காயம் அறுவடை காலங்களில் அவற்றிற்கு உரிய விலை கிடைப்பது இல்லை. கடந்த மாதம் வரை கோவையில் சின்ன வெங்காயம் கிலோ ரூ.30 முதல் ரூ.40 வரை விலை போனது.

இந்த நிலையில் கோவையில் தற்போது நிலவி வரும் பனிப்பொழிவு மற்றும் அவ்வப்போது பெய்து வரும் மழை காரணமாக கோவையில் இருப்பு வைக்கப்பட்டிருந்த சின்ன வெங்காயம் சேதமடைந்தது. இதையடுத்து சின்ன வெங்காயம் விலை கிடுகிடுவென உயர்ந்து உள்ளது. இதனால் இல்லத்தரசிகள் அதிர்ச்சியடைந்துள்ளனர்.

இதுகுறித்து கோவை தியாகி குமரன் மார்க்கெட் காய்கறி வியாபாரிகள் சங்க நிர்வாகி அப்பாஸ் கூறியதாவது:-

ஒரு கிலோ ரூ.100

கோவையில் உள்ள காய்கறி மார்க்கெட்டுக்கு தொண்டாமுத்தூர், நரசீபுரம் உள்ளிட்ட இடங்களில் விளைவிக்கப்படும் சின்ன வெங்காயம் மட்டுமின்றி கர்நாடகா, புனே உள்ளிட்ட இடங்களில் இருந்தும் லாரிகளில் கொண்டு வரப்படுகிறது. ஒரு நாளைக்கு 400 டன் பெரிய வெங்காயம் மற்றும் 100 டன் சின்ன வெங்காயம் விற்பனைக்காக வருகிறது. இந்த வெங்காயங்கள் கேரளாவிற்கு விற்பனை செய்ய இங்கிருந்து கொண்டு செல்லப்படுகிறது. கடந்த 2 வாரங்களுக்கு முன் வரை வெங்காயம் விலை குறைந்து காணப்பட்டது. நேற்று முன்தினம் வரை சின்ன வெங்காயம் கிலோ ரூ.30 முதல் ரூ.50 வரை விற்பனையானது.

இந்த நிலையில் தமிழகத்தில் புயல் காரணமாக வெளி மாநிலங்களில் இருந்து சின்ன வெங்காயம் மற்றும் பெரிய வெங்காயம் வரத்து இல்லை. இதனால் சின்ன வெங்காயத்தின் தேவை அதிகளவு இருப்பதால் அவற்றின் விலை அதிகரித்து உள்ளது. அதன்படி ஒரு கிலோ சின்ன வெங்காயம் ரூ.90 முதல் ரூ.100 வரை விற்பனையாகிறது. பெரிய வெங்காயம் கிலோ ரூ.25 முதல் ரூ.30 வரை விற்பனை செய்யப்படுகிறது. மேலும் பீன்ஸ் ரூ.70, கேரட் ரூ.80, கத்தரிக்காய் ரூ.40, தக்காளி ரூ.15 முதல் ரூ.20, பச்சமிளகாய் ரு.60 என பிற காய்கறிகளின் விலையும் அதிகரித்து உள்ளது.

இவ்வாறு அவர் கூறினார்.