டி.என்.பி.எஸ்.சி. குரூப்-4 தேர்வு

கிருஷ்ணகிரி மாவட்டத்தில் நாளை நடைபெற கூடிய டி.என்.பி.எஸ்.சி. குரூப்-4 தேர்வை 144 மையங்களில் மொத்தம் 45 ஆயிரத்து 522 பேர் எழுதுகிறார்கள்.

இதுகுறித்து கலெக்டர் ஜெயசந்திரபானுரெட்டி வெளியிட்டுள்ள செய்திக்குறிப்பில் கூறியிருப்பதாவது:-

டி.என்.பி.எஸ்.சி. தேர்வு

கிருஷ்ணகிரி மாவட்டத்தில் தமிழ்நாடு அரசு பணியாளர் தேர்வாணையத்தால் நாளை (ஞாயிற்றுக்கிழமை) பல்வேறு பதவிகளுக்கான போட்டி தேர்வு குரூப்-4 நடைபெற உள்ளது. இதையொட்டி மாவட்ட வருவாய் அலுவலர், கலெக்டரின் நேர்முக உதவியாளர் (பொது) மேற்பார்வையில் தமிழ்நாடு தேர்வாணைய பிரிவு அலுவலர்களுடன் தேர்வுகள் சிறப்பான முறையில் நடைபெற தேவையான முன்னேற்பாடுகள் செய்யப்பட்டுள்ளன.

கிருஷ்ணகிரி மாவட்டத்தில் 8 தாலுகாவில் இந்த தேர்வுகள் நடக்கின்றன. கிருஷ்ணகிரி தாலுகாவில் 48 மையங்களில் 16 ஆயிரத்து 354 பேரும், அஞ்செட்டி தாலுகாவில் ஒரு தேர்வு மையத்தில் 425 பேரும், பர்கூர் தாலுகாவில் 11 மையங்களிலும் 3 ஆயிரத்து 167 பேரும், ஓசூர் தாலுகாவில் 35 மையங்களிலும் 10,601 பேரும் தேர்வு எழுதுகிறார்கள்.

45,522 பேர் எழுதுகிறார்கள்

போச்சம்பள்ளி தாலுகாவில் 23 மையங்களிலும் 6 ஆயிரத்து 759 பேரும், சூளகிரி தாலுகாவில் 4 மையங்களில் 1,064 பேரும், தேன்கனிக்கோட்டை தாலுகாவில் 4 மையங்களில் 1,405 பேரும், ஊத்தங்கரை தாலுகாவில் 18 மையங்களில் 5,747 நபர்களும் ஆக மொத்தம் 144 தேர்வு மையங்களில் 45,522 பேர் தேர்வு எழுத உள்ளனர்.

தேர்வு நடைபெறும் மையங்களில் போலீஸ் பாதுகாப்பு, போக்குவரத்து வசதி, மின் வசதி, குடிநீர் வசதி மற்றும் கழிப்பிட வசதி ஆகிய ஏற்பாடுகள் செய்யப்பட்டுள்ளன தேர்வை கண்காணிப்பதற்காக மேற்பார்வை அலுவலர்கள், பறக்கும்படை, நடமாடும் அலகு ஆகியவை அமைக்கப்பட்டுள்ளது.

கடும் நடவடிக்கை

மேலும் மாணவ, மாணவிகள் தேர்வு நடைபெறும் இடத்திற்கு செல்லும் போது பொதுமக்கள் சொந்த காரணங்களுக்காக சாலை மறியல் போன்ற தடங்கல் செய்தாலோ வேறு எவ்வகையிலும் தொந்தரவு கொடுத்தாலோ அவர்களை கைது செய்ய நடவடிக்கை எடுக்க காவல்துறைக்கு உத்தரவிடப்பட்டுள்ளது.

தேர்வு நடைபெறும் சமயத்தில் பொதுமக்கள் தேர்வு மையங்களை சுற்றி ஒலிபெருக்கி மற்றும் பொது நிகழ்ச்சிகள் ஏதேனும் நடத்தி, தேர்வு எழுத செல்வோருக்கோ அல்லது தேர்வு மையங்களுக்கு அருகிலோ இடையூறு செய்தால் அந்த நபர்கள் மீதும் பொது அமைதிக்கு குந்தகம் ஏற்படுத்திய செயலுக்காக கடும் நடவடிக்கை மேற்கொள்ளப்படும்.

இவ்வாறு அதில் கூறப்பட்டுள்ளது.