சத்தியமங்கலத்தில்கந்து வட்டி கேட்டு மிரட்டும் தம்பதி மீது நடவடிக்கைபோலீஸ் சூப்பிரண்டிடம் பெண் கோரிக்கை

சத்தியமங்கலம் வடக்கு பேட்டை பகுதியை சேர்ந்த முரளியின் மனைவி மேகலா (வயது 30) ஈரோடு மாவட்ட போலீஸ் சூப்பிரண்டு அலுவலகத்தில் நேற்று புகார் மனு கொடுத்தார். அந்த மனுவில் அவர் கூறிஇருந்ததாவது:-

எனது மாமியார் ஆஸ்பத்திரியில் சிகிச்சை பெற்று வந்தபோது மருத்துவ செலவுக்காக சத்தியமங்கலம் பகுதியை சேர்ந்த ஒரு தம்பதியிடம் இருந்து ரூ.3 லட்சம் கடன் வாங்கி இருந்தேன். அவர்கள் ஒரே வாரத்தில் ரூ.3 லட்சத்துக்கு ரூ.80 ஆயிரம் வட்டி கேட்டனர். 4 வாரங்கள் வட்டி தொகையை கொடுத்துவிட்டேன். அதன்பிறகும், கந்து வட்டி கேட்டு மிரட்டியதால் பலரிடம் இருந்து கடன் வாங்கி மொத்தம் ரூ.11 லட்சம் கொடுத்து உள்ளேன். ஆனால் மேலும் ரூ.4½ லட்சம் கொடுக்க வேண்டும் என்று அவர்கள் மிரட்டுகின்றனர். எனவே கந்துவட்டி கேட்டு மிரட்டும் தம்பதி மீது நடவடிக்கை எடுக்க வேண்டும்.

இவ்வாறு அந்த மனுவில் அவர் கூறிஇருந்தார்.