விருத்தாசலம் அருகே மரத்தில் மோட்டார் சைக்கிள் மோதல்; பட்டதாரி சாவு

விருத்தாசலம்,

கேரளா மாநிலம், இடுக்கி பகுதியை சேர்ந்தவர் ஜீனோம் (வயது 41). இவர் சிதம்பரம் அண்ணாமலை பல்கலைக்கழகத்தில் கடந்த 2016-ம் ஆண்டு எம்.ஏ. பட்டப்படிப்பு படித்து முடித்தார். இதற்கான சான்றிதழை பெறுவதற்கு கேரளாவில் இருந்து சிதம்பரத்திற்கு நேற்று முன்தினம் மோட்டார் சைக்கிளில் வந்துள்ளார்.

அப்போது விருத்தாசலம்-வேப்பூர் நெடுஞ்சாலையில் விளாங்காட்டூர் பழத்தோட்டம் அருகே சென்று கொண்டிருந்தபோது, திடீரென சாலையோரத்தில் இருந்த புளிய மரம் மீது மோட்டார் சைக்கிள் மோதியது. இதில் படுகாயமடைந்த ஜீனோம் சம்பவ இடத்திலேயே பரிதாபமாக உயிரிழந்தார்.

இதுகுறித்து அறிந்த அவரது குடும்பத்தினர், கேரளாவில் இருந்து விருத்தாசலம் அரசு ஆஸ்பத்திரிக்கு வந்தனர். அங்கு பிரேத பரிசோதனைக்காக வைக்கப்பட்டு இருந்த அவரது உடலை பார்த்து கதறி அழுதனர். விபத்து குறித்து விருத்தாசலம் போலீசார் வழக்குப் பதிவு செய்து விசாரணை நடத்தி வருகின்றனர்.