கிணற்றில் தவறி விழுந்த புள்ளிமான் மீட்பு

கடையநல்லூர்:

கடையநல்லுார் வனச்சரகம் சொக்கம்பட்டி பீட் சிங்கிலிப்பட்டி அருகே புன்னையாபுரத்தில் தனியாருக்கு சொந்தமான 70 அடி கிணற்றில் புள்ளிமான் ஒன்று தவறி விழுந்தது. அதன் பின்னர் வெளியில் செல்ல முடியாமல் தத்தளிப்பதாக அப்பகுதியில் உள்ள விவசாயிகள் வனத்துறைக்கு தகவல் தெரிவித்தனர். உடனே கடையநல்லூர் வனச்சரக அலுவலர் சுரேஷ் உத்தரவின் பேரில் வனவர் முருகேசன் தலைமையில் வனத்துறையினர், கடையநல்லூர் தீயணைப்பு நிலையத்துக்கு தகவல் தெரிவித்தனர். இதையடுத்து நிலைய அலுவலர் ஷேக் அப்துல்லா தலைமையில் தீயணைப்பு படை வீரர்கள் விரைந்து வந்தனர். கிணற்றில் கயிறு கட்டி இறங்கி தொட்டில் கட்டி தொட்டிலில் புள்ளிமானை படுக்க வைத்து பத்திரமாக மேலே தூக்கினர். பின்னர் புள்ளிமானுக்கு முதலுதவி சிகிச்சை அளிக்கப்பட்டு பத்திரமாக சொக்கம்பட்டி முந்தல் வனப்பகுதிக்குள் விடப்பட்டது.