திண்டுக்கல்லில் இருந்து மதுரை விமான நிலையத்துக்கு காரில் பயணித்த பிரதமர் மோடி

மதுரை,

திண்டுக்கல் மாவட்டம் காந்தி கிராம பல்கலைக்கழக 36-வது பட்டமளிப்பு விழாவில் பிரதமர் நரேந்திர மோடி கலந்து கொண்டார். அங்கு நிகழ்ச்சியை முடித்து கொண்டு வானிலை காரணமாக ஹெலிகாப்டருக்கு பதிலாக பிரதமர் மோடி கார் மூலம் மதுரை விமான நிலையம் புறப்பட்டார்.

இதையடுத்து திண்டுக்கல் மற்றும் மதுரை மாவட்டங்களின் போலீசார் உஷார்படுத்தப்பட்டனர்.

திண்டுக்கல் மாவட்டம் அம்பாத்துரையில் இருந்து மதுரை விமான நிலையத்திற்கு சுமார் 65 கிலோ மீட்டர் தூர பயணம் ஆகும்.

42 நிமிடத்தில் வந்தடைந்தார்

எனவே விழா நடந்த இடத்தில் இருந்து முதலில் முதல்-அமைச்சர் மு.க.ஸ்டாலின், அதை தொடர்ந்து கவர்னர் ஆர்.என்.ரவி ஆகியோர் கார்களில் மதுரை புறப்பட்டனர்.

சற்று நேரம் கழித்து பிரதமர் மோடியின் கார் மதுரை விமானநிலையம் நோக்கி புறப்பட்டது. திண்டுக்கல்-மதுரை நான்கு வழிச்சாலையில் கொடைரோடு, வாடிப்பட்டி, நகரி, சமயநல்லூர், நாகமலைபுதுக்கோட்டை, கப்பலூர் வழியாக மதுரை விமான நிலையத்திற்கு 42 நிமிடத்தில் பிரதமரின் கார் வந்தடைந்தது. கப்பலூர் உள்ளிட்ட சில இடங்களில் பொதுமக்கள் கூட்டமாக நின்று கையசைத்து பிரதமரை வரவேற்றனர்.

வழியனுப்பி வைத்தனர்

மாலை 6.25 மணியளவில், தனி விமானம் மூலம் பிரதமர் மோடி மதுரையில் இருந்து புறப்பட்டு, விசாகப்பட்டினம் சென்றார். அவரை வழி அனுப்பிய பின்னர், முதல்-அமைச்சர் மு.க.ஸ்டாலின், கவர்னர் ஆர்.என்.ரவி, முன்னாள் முதல்-அமைச்சர்கள் எடப்பாடி பழனிசாமி, ஓ.பன்னீர்செல்வம், பா.ஜனதா மாநில தலைவர் அண்ணாமலை மற்றும் அதிகாரிகள், பிரமுகர்கள் விமான நிலையத்தில் இருந்து புறப்பட்டனர்.

ஒரே சமயத்தில் பிரதமர், முதல்- அமைச்சர், கவர்னர் மற்றும் முக்கிய தலைவர்கள் வருகையால் மதுரை விமான நிலையம் நேற்று முழுவதும் பரபரப்பாக காணப்பட்டது.

பிரதமருக்கு வரவேற்பு

முன்னதாக நேற்று மதியம் 2.50 மணி அளவில் பெங்களூருவில் இருந்து தனி விமானம் மூலம் மதுரை விமான நிலையத்திற்கு வந்த பிரதமர் நரேந்திரமோடியை கவர்னர் ஆர்.என்.ரவி, அமைச்சர்கள் சாத்தூர் ராமச்சந்திரன், தங்கம் தென்னரசு, மூர்த்தி ஆகியோரும், முன்னாள் முதல்- அமைச்சர் எடப்பாடி பழனிசாமி தலைமையில் முன்னாள் அமைச்சர்கள் செல்லூர்ராஜூ, நத்தம் விசுவநாதன், திண்டுக்கல் சீனிவாசன், ஆர்.பி.உதயகுமார் உள்ளிட்டோரும், ஓ.பன்னீர்செல்வம் மற்றும் அவரது தரப்பிலிருந்து எம்.பி. ரவீந்திரநாத் உள்ளிட்டோரும் பிரதமர் மோடிக்கு தனித்தனியாக பூங்கொத்து கொடுத்து வரவேற்பு அளித்தனர். பா.ஜ.க. சார்பில் மூத்த தலைவர் எச்.ராஜா, மேலிட பொறுப்பாளர் சுதாகர் ரெட்டி ஆகியோர் வரவேற்றனர். பின்னர் பிரதமர் நரேந்திரமோடி அங்கிருந்து ஹெலிகாப்டரில் திண்டுக்கல் சென்றார்.