மோட்டார்சைக்கிள் திருடிய 3 பேருக்கு போலீஸ் வலைவீச்சு

ஓசூர்:

ஓசூர் சிப்காட் பேடரப்பள்ளி எம்.ஜி.ஆர். நகரை சேர்ந்தவர் பிரசாந்த் (வயது 20). கூலித்தொழிலாளி. இவர் கடந்த 26-ந் தேதி தனது வீட்டின் முன்பு மோட்டார்சைக்கிளை நிறுத்தி இருந்தார். அதை மர்ம நபர்கள் திருடிச் சென்றனர். இது குறித்து பிரசாந்த் ஓசூர் சிப்காட் போலீசில் புகார் செய்தார். அதன் பேரில் போலீசார் வழக்குப்பதிவு விசாரணை நடத்தினார்கள். அப்போது மோட்டார்சைக்கிளை திருடியது சிவகங்கை மாவட்டம் திருப்புவனம் தாலுகாவை சேர்ந்த மணிகண்டன் (27), ரித்தீஷ் (24), சிவமணி (24) ஆகிய 3 பேர் என தெரிய வந்தது. இதையடுத்து அவர்கள் 3 பேரையும் போலீசார் வலைவீசி தேடி வருகிறார்கள். அவர்கள் மீது வெடி பொருட்கள் வைத்திருந்ததாக ஏற்கனவே சிவகங்கை மாவட்டத்தில் வழக்கு உள்ளது குறிப்பிடத்தக்கது.